В Ақмола облысында серуенге арналған электробус жүргізушісі медициналық куәландыру оның орташа дәрежедегі алкогольдік масаң күйде екенін растағаннан кейін ұсталды. Көлік құралының салонында бес жолаушы болған.
ҰСТАУ ҚАЛАЙ БОЛДЫ
Polisia.kz, деректеріне сәйкес, патрульдік полиция ротасының қызметкерлері Бурабай кентіндегі Кенесары көшесімен патрульдеу кезінде артқы габариттік шамдары қосылмаған серуенге арналған электробусқа назар аударған.
Тексеру кезінде полицейлер салонда жергілікті демалыс үйлерінің бірінен келе жатқан бес жолаушының болғанын анықтады. Жүргізушімен сөйлесу кезінде қызметкерлер алкоголь иісін сезіп, оны медициналық куәландыруға жіберді.
КУӘЛАНДЫРУ НЕ КӨРСЕТТІ
Бастапқыда жүргізуші өз деректерін беруден бас тартты, алайда кейін қажетті рәсімдерден өтуге келісті. Медициналық куәландыру нәтижелері бойынша оның орташа дәрежедегі алкогольдік масаң күйі анықталды.
Сонымен қатар, полицейлер бұған дейін ер адамның көлік құралдарын басқару құқығынан айырылғанын анықтады.
ЖҮРГІЗУШІ НЕ ДЕДІ
Жүргізушінің өзінің айтуынша, ол демалыс аймақтарының бірінде жүргізуші ретінде тағылымдамадан өтіп жүрген және таныстарын курорттық аймақпен серуендетуді шешкен. Сапар патрульдік полиция қызметкерлерімен кездесумен аяқталды.
Осы факті бойынша сотқа дейінгі тергеу басталды. Жүргізушіге қатысты заңнамаға сәйкес шаралар қабылдануда.
КӘСІПКЕРЛЕРГЕ НЕ ЕСКЕРТІЛЕДІ
Полиция кәсіпкерлерді, әсіресе демалыс орындары мен туристік сала өкілдерін жұмысқа қабылдау алдында қызметкерлердің құжаттары мен мәліметтерін мұқият тексеруге шақырды.
Атап айтқанда, жұмыс берушілер жүргізушілерде көлік құралдарын басқаруға қолданыстағы құқықтың бар екеніне және олардың жұмысқа жіберілуіне кедергі келтіретін шектеулердің жоқтығына көз жеткізуі қажет.
