Сот Оралда қайтыс болған науқастың ұлының талап арызын ішінара қанағаттандырып, ауруханадан 4 млн теңге моральдық зиянды өтеу ретінде өндіріп алды. Сот медициналық көмектің уақтылы көрсетілмеуі өлімнің алдын алудың нақты мүмкіндігін жоғалтуға әкеп соқты деген қорытындыға келді.
СОТ НЕНІ АНЫҚТАДЫ
Жоғарғы Соттың мәліметі бойынша, Оралдың 58 жастағы тұрғыны бірнеше рет медициналық көмекке жүгінген, алайда медицина қызметкерлері әр жолы оған қажетті тексеруден өткізуден бас тартып, мас күйінде болуын сылтауратқан.
Бұл ретте науқасқа ағзадағы алкоголь мөлшеріне тексеру жүргізілмеген. Денсаулық сақтау басқармасының call-орталығына жүгінгеннен кейін ер адам терапия бөлімшесіне жатқызылды, онда оған ишемиялық инсульт диагнозы қойылды. Басталған емге қарамастан, келесі күні науқас қайтыс болды.
ІС ҚАЛАЙ ҚАРАЛДЫ
Ер адам қайтыс болғаннан кейін оның ұлы полицияға жүгінді, алайда қылмыстық құқық бұзушылық құрамының болмауына байланысты сотқа дейінгі тергеп-тексеру тоқтатылды.
Сонымен қатар, денсаулық сақтау министрлігінің медициналық және фармацевтикалық бақылау комитеті департаменті жүргізген тексеру науқасқа медициналық көмек көрсету кезінде бұзушылықтарды анықтады. Медицина қызметкерлерінің әрекетсіздігі әкесінің өліміне әкеп соқты деп санаған ұл моральдық зиянды өтеуді аурухана мен емдеуші дәрігерден бірлесіп өндіріп алу туралы талап арызбен сотқа жүгінді.
ТАРАПТАРДЫҢ ҰСТАНЫМЫ ЖӘНЕ СОТ ШЕШІМІ
Аурухана өкілі талап арызды мойындамады. Прокурор талап қою талаптарын ішінара қанағаттандыру туралы қорытынды берді.
Ұсынылған дәлелдемелерді зерттей келе, Орал қаласының №2 соты медициналық көмектің уақтылы көрсетілмеуі науқасты өлімнің алдын алудың нақты мүмкіндігінен айырды деген қорытындыға келді. Сондай-ақ сот әкесінің қайтыс болуы талапкерге терең рухани азап келтіргенін, ал медицина қызметкерлері тарапынан анықталған бұзушылықтар әділетсіздік, үмітсіздік, ашу және эмоционалдық күйзеліс сезімін тудырғанын атап өтті.
Нәтижесінде сот талап арызды ішінара қанағаттандырып, ауруханадан талапкердің пайдасына 4 млн теңге моральдық зиянды өтеу ретінде өндіріп алды. Сот шешімі заңды күшіне енді.
