Франция Парламенті әлеуметтік желілерде 15 жасқа толмаған адамдарға тіркелуге тыйым салатын заң жобасын бекітті. Тыйым қарастырылған рәсімдер аяқталғаннан кейін 1 қыркүйектен бастап күшіне енуі тиіс.
ЗАҢ ЖОБАСЫ НЕНІ ҚАРАСТЫРАДЫ
DW деректері бойынша, заң жобасын парламент мақұлдағаннан кейін Франция Конституциялық кеңесінің қарауына жібереді, содан кейін оған Франция Президенті Эммануэль Макрон қол қоюы керек.
Құжатқа сәйкес, 1 қыркүйектен бастап 15 жасқа толмаған балаларға әлеуметтік желілерде жаңа есептік жазбалар жасауға тыйым салынады. Сонымен қатар, 2027 жылғы 1 қаңтарға дейін онлайн-платформалар осы жастағы пайдаланушылардың қолданыстағы аккаунттарын жоюы керек.
ТЫЙЫМ ҚАЛАЙ ЖҰМЫС ІСТЕЙДІ
Заң жобасының мәтінінде әлеуметтік желілер пайдаланушылардың жасын қандай тәсілмен тексеруі керектігі көрсетілмегені атап өтіледі. Тексеру механизмін таңдау платформалардың өз қарауына қалдырылған.
Сонымен қатар, заң жобасы онлайн-платформаларды француздық дербес деректерді қорғау саласындағы реттеушінің талаптарына сәйкес жасты тексеру шараларын енгізуге міндеттейді.
ТАҒЫ ҚАНДАЙ ШЕКТЕУЛЕР ЕНГІЗІЛЕДІ
Құжат сонымен қатар жоғары сыныптарда ұялы телефондарды пайдалануға тыйым салуды көздейді. Бұл ретте оқу орындарының ішкі тәртіп ережелерінде ерекше жағдайлар қарастырылуы мүмкін.
Әлеуметтік желілерде тіркелуге тыйым салу онлайн-энциклопедиялар мен білім беру платформаларына қолданылмайды.
ЗАҢ ЖОБАСЫ НЕЛІКТЕН ПАЙДА БОЛДЫ
Заң жобасы француздық денсаулық сақтау саласындағы қадағалау органының әлеуметтік желілердің балаларға ықтимал теріс әсері туралы ескертулерінен кейін әзірленді. Ықтимал қауіптер қатарында өзін-өзі бағалаудың төмендеуі, сондай-ақ өзіне-өзі зиян келтіру, суицид және есірткі қолдану жағдайларының ықтимал өсуі аталды.
Нәтижесінде Франция мұндай тыйымды бекіткен Еуропалық Одақтың алғашқы елі болды. Ұқсас шектеулер БАӘ-де қолданылады, сондай-ақ Ұлыбританияда 2027 жылдан бастап енгізілуде.
