21 сәуірде Шымкент қалалық әкімдігінің ғимараты маңында қала әкімінің орынбасары Руслан Берденовке қарулы шабуыл жасалды. Оқ ату салдарынан ол оқ жарақатын алып, ауруханаға жатқызылды. Бұл ақпаратты Шымкент полиция департаменті растады.
Informburo.kz ведомствоға сілтеме жасап хабарлағандай, күдікті ұсталып, уақытша ұстау изоляторына орналастырылды. Осы факті бойынша қылмыстық іс қозғалды. Тергеу жүргізілуде.
«Шымкент қаласы әкімдігінің ғимараты маңында атыс қаруын қолдану фактісі орын алды. Оқиға салдарынан әкімдік қызметкері жарақат алып, ауруханаға жатқызылды. Оған барлық қажетті медициналық көмек көрсетілуде», - делінген хабарламада.
Белгілі болғандай, Берденовке ота жасалды. Бастапқыда зардап шегушінің жағдайы ауыр деп бағаланды. Төрт сағаттан астам уақытқа созылған отадан кейін оның жағдайы тұрақтанды. Дәрігерлердің айтуынша, өміріне қауіп жоқ.
«Оң жақ кеуде қуысының еніп өтетін оқ-дробты жарақаты, оң өкпенің төменгі бөлігінің, қабырға аралық артериялардың және диафрагманың көптеген зақымдануы; оң жақ гемопневмоторакс», - делінген дәрігердің қорытындысында.
Сондай-ақ науқаста бауырдың зақымдануымен іштің көптеген еніп өтетін жарақаттары, ішкі қан кету, оң жақ бүйректің, иық пен білектің көптеген дробты жарақаттары, сыртқы қан кету анықталды. Плевропульмональды және геморрагиялық шок тіркелді.
Қазір Берденовтің жағдайы тұрақты ауыр деп бағалануда. Ол дәрігерлердің тұрақты бақылауында және барлық қажетті медициналық көмекті алуда.
Руслан Берденов 2025 жылғы ақпанда Шымкент қаласы әкімінің орынбасары болып тағайындалды. Оған дейін ол Парламент Мәжілісінің депутаты қызметін атқарған.