Петропавловск тұрғындары халықаралық эко-блогер Алексей Сибирскийдің қатысуымен өткен экологиялық акция аясында осы көктемде отырғызылған шыршалардың қайда жоғалғанын анықтауға тырысуда.
«Қазинформ» ХАА мәліметінше, акция кезінде блогер қалаға 10 мың шырша көшетін сыйға тартқан, тағы 5 мың ағаш бюджет қаражаты есебінен сатып алынған. Олардың барлығы Борки кенті ауданындағы учаскеге отырғызылған. Алайда бірнеше айдан кейін қала тұрғындары ағаштарды бұрынғы орнынан таба алмай, олардың жойылғаны немесе ұрланғаны туралы сұрақ қоя бастаған.
Акцияға қатысушылардың бірі әлеуметтік желілерде көктемде шыршаларды жеке өзі отырғызып, кейінірек олардың жайылып кеткенін тексеру үшін келгенін айтқан. Оның сөзінше, учаскеде ағаштар қалмаған.
Жағдайды анықтау үшін журналистер Солтүстік Қазақстан облысы табиғи ресурстар және табиғат пайдалануды реттеу басқармасына жүгінген. Ведомство басшысының орынбасары Қайрат Қалықовтың айтуынша, бұл жерде вандализм немесе ұрлық туралы сөз болып отырған жоқ.
«Көктемде отырғызу жүргізілген учаске арқылы халықаралық магистральдық газ және мұнай құбыры өтетіні белгілі болды. Жауапты компанияның өкілдері бұл аумақта үнемі қазба жұмыстары және басқа да техникалық жұмыстар жүргізілетінін ескертті. Көшеттердің ауыр техника астында зардап шекпеуі үшін біз үш мың ағашты қазып алуға мәжбүр болдық. Қалған көшеттерге ешкім қол тигізбеді — олар сол жерде өсіп жатыр», — деп түсіндірді Қайрат Қалықов.
Қалықовтың атап өтуінше, қайта отырғызылған шыршалар екі орман шаруашылығы арасында бөлінген.
«Көшеттердің бір бөлігі Боголюбов орман шаруашылығының питомнигіне тасымалданып, отырғызылды. Қалған ағаштар Петропавловск маңында орналасқан Куйбышев орман шаруашылығының аумағына ауыстырылды. Егер жас ағаштар техника дөңгелектері астында қалған болса, бұл шынымен өкінішті болар еді», — деп қосты ол.