Премьер-министрдің орынбасары – ұлттық экономика министрі Серік Жұманғариннің баспасөз хатшысы - Әлия Рахимова көршілес елдердегі ҚҚС қолдану шектері туралы ақпараттағы сәйкессіздіктің себебін түсіндірді.
Exclusive.kz деректеріне сәйкес, Рахимова Жұманғариннің «Қазақстанская правда» басылымына сұхбатын ұйымдастырумен өзі айналысқанын хабарлады. Ол вице-премьердің жұмыс кестесінің тығыздығына байланысты сұхбат қашықтан дайындалып, журналистің сұрақтарына жазбаша түрде жауап берілгенін түсіндірді.
«Көршілес елдердегі ҚҚС шектері туралы сөз болғанда, алдымен Ресей Федерациясы бойынша деректер келтірілді, онда шек валюта бағамына байланысты шамамен 10 млн теңгені құрайды. 30,1 млн теңге – бұл Беларусьтегі шек, бірақ мен қателесіп, оны Өзбекстанда деп қалдырдым. Шын мәнінде, Өзбекстанда ҚҚС есебіне қою шегі 39 млн теңгені, Қырғызстанда – 46,9 млн теңгені құрайды. Бұл сандар Мемлекет басшысының төрағалығымен өткен үкіметтің кеңейтілген отырысындағы ҰЭМ презентацияларында, брифингтерде, сарапшылық алаңдарда, «Атамекен» ҰКП презентациясында барлық жерде болды. Бірақ мен мұны жіберіп алдым, ал вице-премьермен сұхбаттың соңғы нұсқасын келістіруге үлгермедім. Қатемді сіздің жарияланымыңызды көргенде ғана түсіндім», - делінген хабарламада.
Баспасөз хатшысы сұхбат авторынан қате деректерді жоюды сұрап, жаңасын дайындағанын мәлімдеді.
«Біз заңды тұлғалар бойынша деректермен толықтырғымыз келді, бұған уақыт кетті. «Қазправдаға» дұрыс деректерді жібердім. Көршілес елдердегі шектер туралы деректер бюджеттік-салық реформасы шеңберінде жүргізілетін есептеулерге ешқандай әсер етпейтінін қосқым келеді», - деді Әлия Рахимова.
Естеріңізге сала кетейік, бұған дейін ұлттық экономика министрі Серік Жұманғарин «Қазақстанская правдаға» берген сұхбатында көршілес елдердегі ҚҚС қолдану шектері туралы деректер келтірген болатын. Өз кезегінде басқа бір басылымның журналистері анықтағандай, Жұманғариннің мәлімдемелері шындыққа сәйкес келмейді.