Маңғыстау облысы мемлекеттік кірістер департаментінің қызметкері букмекерлік кеңсеге ставка жасағаны үшін лауазымынан шеттетілді.
Мемлекеттік қызмет істері агенттігі департаментіне сілтеме жасаған Lada.kz хабарлағандай, осы факті бойынша қызметтік тергеу тағайындалды.
«Мемлекеттік қызметші 15.08.2020 жылы «Netbet» ЖШС-де ойыншы ретінде тіркелген. 25.12.2023 пен 13.12.2024 аралығында құмар ойын шотына 56 500 теңге көлемінде ақша салынып, 70 550 теңге көлемінде ақша алынған», - деп хабарлады ведомство.
Облыстық мемлекеттік кірістер департаментінің тәртіптік комиссиясы тергеу нәтижелерін қарап, аталған қызметкерді лауазымынан босатуды ұсынды.
«Мемлекеттік қызметшінің құмар ойындарға қатысуын шектеу туралы «Сыбайлас жемқорлыққа қарсы іс-қимыл туралы» Заңға өзгерістер енгізілгенге дейін, сондай-ақ ол өзі сыбайлас жемқорлыққа қарсы шектеулерді қабылдағаннан кейін де құмар ойын шотын толтыру және ақша алу арқылы құмар ойындарға қатысқаны расталды. Осы жағдайларға байланысты мемлекеттік қызметші департамент басшысының бұйрығымен мемлекеттік қызмет және сыбайлас жемқорлыққа қарсы шектеулер туралы заңнама талаптарын бұзғаны үшін лауазымынан босатылды», - деп хабарлады департаментте.
Еске сала кетейік, бұрын Солтүстік Қазақстан облысында букмекерлік кеңсеге ставка жасағаны үшін Ақжар ауданы әкімдігінің құрылыс және сәулет бөлімінің бас маманы, сол ауданның білім бөлімі қызметкерлері және Уәли ауылдық округі әкімдігі аппаратының бас мамандары жұмыстан шығарылған болатын.