Қытайда мемлекеттік қызметшілерге үш адамнан артық компаниямен түскі ас ішуге тыйым салынды. Бұл шектеу сыбайлас жемқорлыққа қарсы науқанның және банкеттерде шамадан тыс алкоголь ішімдіктерін ішу салдарынан шенеуніктердің бірқатар қайтыс болуы оқиғаларынан кейінгі тәртіпті күшейтудің бір бөлігі болып табылады. Бұл туралы Reuters агенттігі хабарлайды.
Агенттіктің ақпараты бойынша, жергілікті билік мұндай оқиғаларды жасыруға тырысқан: отбасылармен келісімдер жасап, өтемақы төлеген. Алайда жағдайлар жұртшылыққа белгілі болып, ондаған шенеуніктерге тәртіптік жаза қолданылды.
Жаңа шаралар тек алкоголь ішімдіктерін тұтынуға ғана емес, сонымен қатар сыбайлас жемқорлық, сән-салтанат және ысырапшылдық көріністеріне қарсы бағытталған. Енді шенеуніктерге корпоративтік кешкі астар ұйымдастыруға, қымбат көліктерді пайдалануға және күмәнді құрылыс жобаларын бастауға тыйым салынды.
«Мемлекеттік қызметшілер арасында спирттік ішімдіктерді тұтыну мәдениеті шынымен де өте күрделі, бірақ олар әзірге жақсы шешім таппады, сондықтан тек «one size fits all» саясатын енгізе алады», — деді Сингапур Ұлттық университетінің доценті Альфред Ву.
Анықтама үшін: «One size fits all» (бір өлшем, бәріне жарамды) - бұл киім өндірісі, саясат және білім беру сияқты әртүрлі салаларда қолданылатын тұжырымдама. Ол жеке ерекшеліктеріне немесе қажеттіліктеріне қарамастан, бірдей өлшем, ереже, тәсіл немесе шешім барлығына жарамды дегенді білдіреді.
Сонымен қатар, жергілікті жерлерде шектеулер әртүрлі түсіндіріледі. Сычуаньда мемлекеттік қызметшілерге жұмыстан кейін бірден үйге бару ұсынылса, Аньхойда күн сайын алкоголь тестілеу жүргізіледі, Уханьда басқа бөлімдердегі әріптестермен түскі ас ішуге тыйым салынған, ал Шэньсиде тіпті жұмыс үстелдерін гүлдермен безендіруге де тыйым салынған.
Шаралар төраға Си Цзиньпиннің партиялық тәртіпті күшейту және бюджет қаражатын үнемдеу бағытына сәйкес келеді. Сарапшылар мұның ішкі тұрақсыздық және экономикалық қиындықтар жағдайында шенеуніктер аппаратын бақылауды күшейту құралы екенін атап өтеді.
Бұған дейін біз Қытай Коммунистік партиясы Орталық Комитетінің және Қытай Мемлекеттік Кеңесінің шенеуніктердің шығыстарын бақылауды күшейтетін қаулысы туралы жазған болатынбыз. 63 баптан тұратын құжат ысырапшылдыққа қарсы күреске бағытталған. Қытайдың Қаржы министрі Лань Фоань сол кезде шенеуніктерді «белді буып алуға» және бюджет қаражатын ұқыпты жұмсауға шақырды.
Еске сала кетейік, ҚР Президенті Қасым-Жомарт Тоқаев та бюджет қаражатын толық үнемдеу және оны тек ең өзекті міндеттерді шешуге ғана жұмсау қажеттігін айтқан болатын.