Желіде кәсіпкер Азат Болатов ел басшылығынан алаяқтықтан зардап шеккен ретінде өзі қатысып жатқан қылмыстық істің тергелуін бақылауға алуды сұраған видео таралуда.
БАҚ мәліметінше, ол Қазақстанның оңтүстігінде автокөліктерді заңсыз қайта ресімдеу мүмкіндігі туралы айтқан.
«Мен, Болатов Азат, ҚР азаматы, жеке кәсіпкерлікпен айналысамын, көлік құралдарын жалға беремін. Қылмыстық істің тергелуіне араласып, оны ерекше бақылауға алуды сұрап, сізге жүгінуге мәжбүрмін», - деді Болатов.
Оның сөзінше, қылмыстық іс Жамбыл облысы полиция департаментінде тергелуде. Белгілі болғандай, маусым айында кәсіпкер оның автокөліктерін иемденген алаяқтардың құрбаны болған.
«Ұрланған сегіз көліктің екеуін өз бетімше таптым, олар жалған нөмірлермен жүрген, ал оның біреуінің VIN-коды өшіріліп, Шымкент қаласындағы автоЦОН-да заңсыз тіркелген. Бұл адамдардың, ең алдымен, құқық қорғау органдарында, автоЦОН-дарда қамқоршылары бар, себебі олар ешқандай заңнан қорықпай, жазасыз қалатынына сенімді болып, қылмыс жасауда. <...> бұл адамдар қандай да бір жолмен ұсталмай, еркіндікте жүр, бірақ полиция қызметкерлерінде жауап алу хаттамалары бар», - деді кәсіпкер.
Кәсіпкер Президент Қасым-Жомарт Тоқаевтан, Премьер-министр Олжас Бектеновтен, Бас прокурор Берік Асыловтан және Ішкі істер министрі Ержан Сәденовтен жағдайға араласып, қылмыстық істің объективті тергелуін қамтамасыз етуді сұрайды. Оның сөзінше, ұрланған сегіз көлік үшін ол әлі күнге дейін несие төлеп жүр.
«Екі кәмелетке толмаған баласы және II топтағы мүгедек қарт ата-анасы бар, жалғыз асыраушысы болып табылатын отбасыммен тұрған жалғыз баспанамды сатуға мәжбүр болдым. Әділдікті қалпына келтіру және осы жазасыздықтың салдарынан туындауы мүмкін және менің әділ тергелу құқығыма ғана емес, басқа азаматтардың қауіпсіздігіне де қатер төндіретін осы топтың одан әрі қылмыстарын тоқтату үшін сіздің араласуыңыз қажет. Сондай-ақ, Премьер-министрдің қаулысымен автокөліктерді есепке қоюдың көлеңкелі схемаларын анықтау тапсырылғанын атап өткім келеді», - деп қорытындылады Болатов.
Еске сала кетейік, 2021 жылғы наурызда СҚО-да Ресейден автокөліктерді контрабандалық жолмен әкеліп, Қазақстан аумағында заңсыз тіркеумен айналысқан трансұлттық топ ұсталды. Экономикалық тергеу департаменті 54 жеңіл автокөлікті, 6 жүк көлігін, құжаттар мен мемлекеттік тіркеу нөмірлерін тауып, тәркіледі.
Сол кезде автокөліктерді Қазақстанға қосалқы бөлшектер ретінде әкелгенін айтқан, алайда біздің ақпаратымыз бойынша, Ресейде бұл көліктерді жеке автосалондарда айналымдағы адамдарға несиеге ресімдеген немесе Армениядан кедендік рәсімдеусіз әкелген. Сол кезде көлік сатып алғанда нөмірлерді салыстыруды, ресейлік базалар бойынша тексеруді және ресейлік есепте тұрған көлікті сатып алудағы барлық тәуекелдерді ескеруді ұсынған едік.
2023 жылғы наурызда Қостанайда Сыбайлас жемқорлыққа қарсы қызметтің, «Азаматтарға арналған үкімет» КЕАҚ және ҚР ІІМ Әкімшілік полиция комитетінің барлық құрылымдық бөлімшелерінің басшылары қатысқан кеңес өтті. Кеңесте ҚСҚҚ негізін қалаушы Кирилл Павлов тек Қостанайда ғана VIN-нөмірлері өшірілген 700-ге жуық автокөлік бар екенін, Петропавлда олардың саны 400-500 бірлікті құрайтынын мәлімдеді.
Полиция мұндай көліктерді есепке қоюға тыйым салады, мемлекеттің олармен не істемек ниеті белгісіз. Осыған байланысты Павлов оларды ауыл мұғалімдері, дәрігерлер және учаскелік полиция қызметкерлері арасында бөлуді ұсынды. Ұсыныс хаттамаға енгізілді, алайда мұндай тәжірибенің қолданылғаны туралы хабарланбады.
Осы жылдың шілдесінде Кирилл Павлов өзінің YouTube-арнасында Қазақстандағы автокөліктердің «сұр нарығы» және қазақстандық шекара арқылы әкелінген көлік құралдарын заңсыз тіркеу схемалары туралы айтқан видео жариялады.