Қырғыз Республикасы ҰҚМК шекара қызметі қырғыз-қазақстандық шекарада 4 775 000 сом (27 504 000 теңге) құнындағы темекі бұйымдарының партиясы ұсталғанын хабарлады.
Ведомствоның баспасөз қызметінің мәліметінше, Қырғыз Республикасы ҰҚМК басқармасының Шу облысы бойынша «Тоқмақ» заставасы шекаралық наряды шекара маңында Қазақстанға қарай бет алған Mercedes Benz Sprinter көлігін анықтады.
Көлік құралын тоқтату нәтижесінде Қазақстанға заңсыз шығаруға тырысқан Қырғыз Республикасының екі азаматы ұсталды, олар акциздік маркасыз Oris және Oscar темекі бұйымдарының 187 қорабын шығаруға әрекеттенген.
Ұсталған азаматтар мен жүк одан әрі тергеу үшін құзыретті органдардың қызметкерлеріне тапсырылды.
Еске сала кетейік, бұрын хабарланғандай, 2023 жылы темекі контрабандасы салдарынан Қазақстанның мемлекеттік бюджеті шамамен 33 млрд теңге кіріс алмаған.
2024 жылғы қыркүйекте Маңғыстау облысы ҚЭМ қызметкерлері Түрікменстан аумағынан кедендік бақылауды айналып әкелінген контрабандалық темекі партиясын анықтады. Тәркіленген 6,5 млн бума темекінің құны шамамен 1,5 млрд теңге деп бағаланды.
Кейін шекарашылар қазақстан-қырғыз шекарасында темекіні заңсыз әкелу әрекеттеріне жол бермеді. Темекі бұйымдары ілеспе құжаттар бойынша болгар бұрышы орналасуы тиіс рефрижератордан табылды. Тінту кезінде Oris, Parliament және Zumerret маркалы 180 мың бумадан астам мәлімделмеген темекі алынды.
Қазан айында Ақтөбе облысында «Жайсан» автомобиль өткізу пункті арқылы Қазақстаннан ірі партия темекіні заңсыз шығару әрекетінің жолы кесілді. Сонда 71 мың бумадан астам темекіні ілеспе құжаттарсыз, көкөніс салынған жәшіктердің астына жасырып шығаруға тырысқан.
Желтоқсанда Маңғыстау облысында «Морпорт» кеден бекетінде Ираннан келген контейнерді тінту кезінде Oris контрабандалық темекілерінің ірі партиясы анықталды. Қылмыскерлер қоқыс жәшіктерінің астында 226 мың бумадан астам 85,9 млн теңге құнындағы темекіні өткізуге тырысқан.
Ағымдағы жылдың қаңтарында ҰҚК шекара қызметінің Жамбыл облысы бойынша департаменті Қазақстанға 170 мың бума темекіні заңсыз әкелуге жол бермеді. Алдын ала бағалау бойынша, алынған тауардың құны 50 млн теңгеден асады.