МВД алкоголь және темекі өнімдерінің заңсыз айналымына байланысты қылмыстардың алдын алу және анықтау бойынша іс-шаралар өткізді.
Polisia.kz мәліметтері бойынша, үш күн ішінде полицейлер заңсыз айналымнан тиісті құжаттары жоқ 7 тоннадан астам құрамында спирті бар өнімді алып қойды. Шамамен 160 мың бума заңсыз темекі, 26 мыңнан астам вейп, оларға арналған 34 мыңға жуық картридж, 35 мың май текшесі және мың бумадан астам снюс тәркіленді.
Құқық қорғау органдары 17 сотқа дейінгі тергеп-тексеруді, 18 әкімшілік іс жүргізуді бастады, сондай-ақ Қаржы мониторингі агенттігіне және мемлекеттік кірістер комитетіне 35 материал жолдады.
Мысалы, Павлодарда полицейлер заңсыз электронды темекілер, олардың бөлшектері және толтыруға арналған сұйықтықтары бар қойманы анықтады.
«3,5 мың вейп, оларға арналған 10 мыңға жуық бөлшек және шылым толтыруға арналған 3,7 мың бірлік сұйықтық алынды. Тауардың 30 жастағы иесі ұсталды. Тәркіленген бұйымдардың жалпы сомасы 150 млн теңгені құрады», - делінген хабарламада.
Алматы облысында құқық қорғау органдары алкоголь өнімдерін заңсыз өндіру және сату фактісін анықтады.
Жергілікті тұрғынның жерасты цехынан 2 тонна 600 литр алкоголь, 500 литр шикізат, 65 литр дайын өнім және 60 литр этил спирті алынды. Жалпы полицейлер 3 тонна 225 литр өнімді алып қойды.
«Айта кету керек, шығу тегі күмәнді мұндай тәркіленген акциздік өнім азаматтардың өмірі мен денсаулығына елеулі қауіп төндіреді. Сертификаттау мен сапаны бақылаудың болмауы улану және басқа да жағымсыз құбылыстар қаупін едәуір арттырады. Алкоголь және темекі өнімдерінің заңсыз саудасы мен көлеңкелі өндірісін жою жұмыстары жалғасуда», — деді ІІМ ұйымдасқан қылмысқа қарсы күрес департаментінің өкілі Қуандық Алпыс.
Еске сала кетейік, наурыз айында Тараздың мамандандырылған әкімшілік соты «ASCO Pro» ЖШС-нен 110,2 млн теңге сомасындағы алкоголь өнімдерін тәркілеу туралы шешім шығарды. Алайда кәсіпорынның бұрынғы басшысы тәркіленген тауарды өзінде қалдыруды ұйғарды. Нәтижесінде Тараздың №2 соты оны кінәлі деп танып, 1 жыл 3 ай бас бостандығынан айыруға соттады.
Тамыз айында Шымкентте контрафактілік алкоголь өндіретін жерасты цехы анықталды. Жергілікті тұрғын контрафактілік өнімді сату үшін «Absolut», «Зеленая марка», «Айдабульская», «Qulan» және басқа брендтерді пайдаланған.