Қазақстандағы инфляция Еуразиялық экономикалық одақ (ЕЭО) елдері арасында ең жоғарылардың бірі болып қалып отыр.
Ulysmedia.kz хабарлағандай, Қазақстандағы жылдық инфляция қараша қорытындысы бойынша 8,4% құрады, бұл ЕЭО мемлекеттері арасындағы екінші нашар көрсеткіш болып табылады.
Еуразиялық экономикалық комиссияның деректері бойынша, ЕЭО елдеріндегі инфляция кестесі келесідей:
- Армения — 1,4%;
- Беларусь — 5,5%;
- Қырғызстан — 5,7%;
- Қазақстан — 8,4%;
- Ресей — 8,9%.
Өткен жылдың қарашасымен салыстырғанда Қазақстанда инфляция 1,9 пайыздық тармаққа (п.т.), ал Қырғызстанда 2,4 п.т. төмендеді. Сонымен қатар, Беларусьте (+0,1 п.т.) және Ресейде (+1,4 п.т.) инфляция шамалы өсті. Арменияда инфляцияға қарама-қарсы процесс – дефляция байқалады.
Баға құрылымы бойынша динамика келесідей бөлінді:
- Қазақстан мен Қырғызстанда азық-түлік тауарлары бағасының өсуі баяулады;
- Армения, Қазақстан және Қырғызстанда азық-түлік емес тауарларға инфляция төмендеді;
- Беларусь пен Қырғызстанда қызметтер бағасының өсуі баяулады.
Белгілі болғандай, биылғы инфляциялық динамика аясында ЕЭО елдерінің орталық банктері негізгі мөлшерлемелерді түзетті:
- Арменияның орталық банкі мөлшерлемені 7,0%-ға дейін төмендетті;
- Қырғызстанның ұлттық банкі мөлшерлемені 9,0% деңгейінде белгіледі;
- Беларусьтің ұлттық банкі мөлшерлемені 9,5% белгісінде сақтады;
- Қазақстанның ұлттық банкі мөлшерлемені 15,25%-ға дейін көтерді;
- Ресейдің орталық банкі мөлшерлемені рекордтық деңгейде — 21,0% белгіледі.
Айта кетейік, бұған дейін Ұлттық банк төрағасы Тимур Сүлейменов инфляциялық қысымның негізгі факторы 13,3%-ға жеткен ақылы қызметтер бағасының өсуі болып қалатынын хабарлады. Оның айтуынша, мұның себептері «Инвестицияларға айырбасталған тариф» бағдарламасын іске асыру және нарықтық қызметтер құнының секіруі болды.