2025 жылдың 1 маусымынан бастап бүкіл Қазақстан аумағында есірткі өсіру, өндіру және таратудың жолын кесуге бағытталған «Қарасора-2025» жедел-профилактикалық операциясы басталды. Қарағанды облысы Полиция департаментінің баспасөз қызметі операцияның өңірдегі жетістіктері туралы хабарлады.
Қарағанды облысында бақылаудың күшейтілген шаралары енгізілді. Өңірдің негізгі автомобиль жолдарында енді тәулік бойы жұмыс істейтін мобильді бекеттер орналастырылды. Операцияға 150-ден астам полиция қызметкері тартылып, 30 қызметтік көлік пен арнайы техника жұмылдырылды. Барлық күдікті көлік құралдары мен бағыттар тексерілуге жатады.
Операцияның бірінші күні Осакаров ауданының Батпақ ауылында есірткі қылмысына қарсы күрес басқармасының қызметкерлері облыстық прокуратураның жәрдемдесуімен жасырын есірткі зертханасын жойды. Шахтинск қаласының 24 және 25 жастағы екі тұрғыны ұсталды, олар 3 млн теңге тұратын жеке үйді сатып алып, онда есірткі заттарын өндіруді ұйымдастырған.
Тінту барысында химиялық заттары бар 121 канистр, арнайы жабдық, оның ішінде пресс және реактор, респираторлар және жеке қорғаныс құралдары алынды. Алынған химиялық заттардың жалпы салмағы шамамен 2 тоннаны құрады. Қарағанды облысы полиция департаменті бастығының бірінші орынбасары Әбіл Әбілдиннің сөзінше, бұл 2025 жылдың басынан бері үшінші ірі оқиға болып отыр. Ұсталғандарға қатысты қылмыстық істер қозғалып, олар уақытша ұстау изоляторына орналастырылды.
Айта кету керек, өңірдегі алдыңғы операциялар да сәтті болды. Мамыр айында Бұқар-Жырау ауданының Жаңақала ауылында полиция қызметкерлері облыстық прокуратураның үйлестіруімен мефедрон синтетикалық есірткісінің жасырын өндірісін жойды. Шамамен бір тонна химиялық прекурсорлар және 500 грамнан астам дайын есірткі заты алынды. Алматы облысының 38 жастағы тұрғыны ұсталып, қылмыстық іс қозғалды.
Сонымен қатар, бұрын Асыл ауылында құқық қорғау органдары осыған ұқсас жасырын өндірістің қызметін тоқтатып, шамамен 200 кг есірткі мен кәсіби жабдықты алып қойды. Алматы қаласының екі тұрғыны — 25 жастағы ер адам және 29 жастағы әйел ұсталды.
Қарағанды облысы Полиция департаменті «Заң және тәртіп» қағидатын іске асыру аясында есірткі қылмысына қарсы күрес құқық қорғау органдары қызметінің басым бағыты болып қала беретінін атап өтеді. Қазақстанда есірткі өндіргені және таратқаны үшін өмір бойы бас бостандығынан айыруға дейінгі жаза қарастырылғанын еске саламыз.