Алматыдағы Бұқар Жырау бульварында жерасты газ қоспасының жарылысы болды. Оқиға газ құбырын опрессовкалау жұмыстары жүргізіліп жатқан кезде орын алды. Нәтижесінде асфальт зақымданып, жол талғамайтын көлік аударылып, тағы бір автокөлік зардап шекті.
Bes.media мәліметінше, жанынан өтіп бара жатқан куәгер жарылыс күтпеген жерден болғанын айтты.
«Өз көлігіммен келе жатқан едім, газ жарылды. «Прадик» (Toyota Land Cruiser Prado) аударылып кетті. Менің көлігіме бір үйінді тас түсті, қазір ойықтар, сызаттар бар», – дейді бейнеавтор.
Бейнежазбада жолдың жүру бөлігіндегі үлкен шұңқыр, аударылған жол талғамайтын көлік және шашылып жатқан асфальт пен тас сынықтары көрінеді.
Газбен жабдықтау компаниясы «QazaqGaz Aimaq» АҚ оқиғаға түсініктеме берді.
«Мердігер «СантехКомплектГрупп» ЖШС ұйымы орындаған жаңадан салынған орта қысымды жерасты газ құбырын опрессовкалау жұмыстары кезінде ауа қоспасының шығуы болды. Оқиға салдарынан жол жамылғысының, ағаштың және автокөліктің зақымдануы тіркелді. <…> Оқиға орны қоршауға алынды, халыққа қауіп жоқ. Құрбандар жоқ», – делінген хабарламада.
Компанияда оқиға орнында газ құбырына тексеру жүргізіліп, оқиғаның себептері анықталып жатқанын атап өтті.
Өз кезегінде Zakon.kz Алматы қалалық денсаулық сақтау басқармасының баспасөз қызметіне сілтеме жасап, жарылыстан екі адам зардап шеккенін, олар Орталық қалалық клиникалық ауруханаға жеткізілгенін хабарлайды.
«Барлық қажетті тексерулер жүргізілгеннен кейін оларға жұмсақ тіндердің көгеруі диагнозы қойылды. Науқастардың жағдайы тұрақты, ауруханаға жатқызуды қажет етпейді», – делінген хабарламада.
Қарап тексеруден кейін зардап шеккендер амбулаториялық емделуге жіберілді.