Бас прокуратураның және Ішкі істер министрлігінің Интерпол қызметкерлері Қазақстан елшілігінің көмегімен Біріккен Араб Әмірліктерінен (БАӘ) Дубайдан қазақстандық азаматты алаяқтық үшін қылмыстық жауапкершілікке тарту үшін экстрадициялады.
Бас прокуратура баспасөз қызметінің мәліметінше, күдікті 2022 жылдан 2023 жылға дейін Алматыда «Wildberries» компаниясына инвестиция ретінде және сыйақы уәде етіп, алты адамның ақша қаражатын алдау жолымен иемденген.
Қылмыстар жасағаннан кейін ол жасырынып, екі жыл бойы халықаралық іздеуде болған. Ағымдағы жылдың сәуірінде ол БАӘ аумағында ұсталып, Бас прокуратураның сұрауы бойынша Қазақстанға экстрадицияланды.
Қазіргі уақытта күдікті тергеу изоляторына орналастырылды. Жасаған қылмыстары үшін оған мүлігін тәркілей отырып, үш жылдан жеті жылға дейінгі мерзімге бас бостандығынан айыру жазасы қауіп төндіреді.
Еске сала кетейік, тек маусым айында ғана Қазақстанның құқық қорғау органдары шетелде жасырынып жүрген үш азаматты экстрадициялады. Мәселен, Ресейден экстрадицияланған қазақстандық қылмыстық топқа, контрабандаға және есірткінің заңсыз айналымына қатысқан деп күдіктелген.
Сондай-ақ Бас прокуратура және Қаржылық мониторинг агенттігі қызметкерлері Грузиядан жалған банкноттарды сақтау және өткізуде айыпталған Қазақстан азаматын қайтарды.
Сонымен қатар Ресейден Қазақстанға экстрадицияланған күдікті Астанадағы банктердің бірінің филиалынан 31 млн теңгеден астам қаражатты ұрлаған делінген.