Қазақстанда өткен жылы анықталған бұзушылықтардан кейін балалар лагерьлерін қабылдау ережелері қатаңдатылды.
informburo.kz деректері бойынша, Алматы қаласы білім басқармасы басшысының орынбасары Айдын Сайлаубай қалада лагерьлерді қабылдауды бақылайтын мониторингтік топ құрылатынын хабарлады.
Сондай-ақ, билік өтінім беру ережелерін қатаңдатқаны, атап айтқанда, техникалық ерекшелікте көрсетілетін талаптарды күшейтіп, жұмыскерлердің міндетті педагогикалық өтілі болуы қажеттігін қосқаны белгілі болды.
«Өткен жылғы жағдай тек Алматының ғана емес, бүкіл республиканың проблемаларын көтерді. Біз бұрын бірнеше рет айтқанбыз: процедуралық мемлекеттік сатып алуларда бұзушылық орын алды. Қазір барлығын дұрыс емес жасаған бас маман сотталды. Енді шаралар қабылданды – техникалық ерекшелік қайта қаралды», – деді Айдын Сайлаубай.
Сонымен қатар, білім басқармасы барлық талаптарға жауап беретін жаңа лагерь ашуды жоспарлап отыр. Қолданыстағы «Өрнек» лагерін жаңғыртып, оның сыйымдылығын 300 орыннан 500 орынға дейін арттыруды көздейді.
Бұдан бөлек, 500 орынға арналған жаңа лагерь салынады деп күтілуде. Биыл сонымен қатар өңірлерде бес жаңа сауықтыру орталығын ашу жоспарланса, 2026 жылға қарай 50 жаңа орталық ашу жоспарланған.
Оқу-ағарту министрлігінің деректері бойынша, еліміздегі 11 мыңнан астам лагерь балаларды қабылдауға дайын.
«Ведомство балалардың сауықтыру орталықтарының тізілімін бекітіп, іс-шаралар жоспарын қабылдады. Оған заңнамалық нормалар, бағдарламалар, мониторинг және бақылау кіреді. Биыл алғаш рет еріктілер мен қосымша білім беру педагогтарын тарта отырып, лагерьлердің әрбір түріне бірыңғай талаптар әзірленді», - делінген хабарламада.
Еске салайық, бұған дейін Қостанай облысындағы балалар лагерінен прокуратура бильярд пен саунаны тапқан болатын.
Одан бөлек, Алматы облысындағы жеке балалар лагерлерінің бірінде көпбалалы отбасылардың оқушыларына тегін демалыс ұйымдастырылғаны, алайда олар ескі кереуеттері бар лас бөлмелерде ұйықтауға мәжбүр болғаны белгілі болды.
Бірақ қоғамда резонанс тудырған ең жанжалды жағдай Алматыда орын алды, онда әлеуметтік осал топтардағы оқушыларды уәде етілген лагерьдің орнына сауна ғимаратында орналастырған болатын.