Алматы облысында қамыс өртеніп, кейін от орманға ауысты. Осы факті бойынша құқық қорғау органдары қылмыстық іс қозғады.
ТЖМ баспасөз қызметінің хабарлауынша, өрт Балқаш ауданында 19 сәуірде болған. От 31 га орманды шарпыған.
«Осы факті бойынша ішкі істер органдары ҚР ҚК-нің 341-бабы «Ормандарды жою немесе зақымдау» бойынша қылмыстық іс қозғады. Осы баптың санкциясы мүлкін тәркілей отырып, сегіз жылға дейін бас бостандығынан айыруды көздейді», – деді ТЖМ-де.
Өртті сөндіру үшін тікұшақтан жалпы көлемі 387 тоннадан астам 129 рет су төгілгені хабарланады. Қазіргі уақытта өрт оқшауланды.
Еске сала кетейік, экология және табиғи ресурстар министрлігінің тексеруінен кейін белгілі болғандай, Павлодар, Ақмола, Қостанай облыстары, сондай-ақ «Семей орманы» резерваты ықтимал өрттерге дайын емес.
Кейінірек хабарланғандай, «Семей орманында» 4,1 млрд теңгеге өрт туралы ерте хабарлау жүйесі орнатылмайды.
Айта кетейік, өткен жылдың маусым айында Абай облысының ормандарында ірі өрт болып, соның салдарынан «Семей орманы» орман табиғи резерватының 14 қызметкері қаза тапты.