Алматыда екі жыл бұрын ботаникалық бақ аумағында 1969 жылы салынған көрме жылыжайын қайта жаңарту басталған еді, алайда мердігерлер жұмысты аяқтамады.
«Қазинформ» ХАА мәліметінше, қазір бақ жылыжайдың қайта жаңартуын аяқтау үшін демеушілер іздестіруде. Оның ауданы 1025 м² құрайды. Қайта жаңарту басталғанға дейін коллекцияда 500-ден астам тропикалық өсімдік болған.
«2022 жылы мердігерлер бізге жылыжайды суық түскенше аяқтаймыз деп уәде берген еді, сондықтан біз оқиғалардың мұндай бетбұрысын күтпегенбіз. Қатарынан екі қыс бойы өсімдіктерді өз күшімізбен жылытуға, электрлік жылытқыштармен жылытуға тура келді. Қазан айынан наурыз айына дейін біздің қызметкерлер мен қызмет көрсететін компания қызметкерлері қажетті температуралық режим мен ылғалдылықты сақтау үшін тәулік бойы жұмыс істеді», — деді тропикалық және субтропикалық өсімдіктер зертханасының меңгерушісі Шолпан Масалимова.
Өз кезегінде бақтың заңгері Ерік Тойжанов 2022 жылы жылыжай ғимаратын қайта жаңартуға және техникалық қадағалау қызметін сатып алуға мемлекеттік сатып алу конкурсын «ШАХ Құрылыс компаниясы» ЖШС жеңіп алғанын хабарлады.
Сәуір айында компания жұмысқа кірісті, бірақ жыл соңына қарай құрылыс материалдарының қымбаттауына байланысты сметалық құнды ұлғайтуды талап етіп, құрылысты тоқтатты.
«Келісімшарт 2022 жылғы ақпанда 1,5 млрд теңге сомасына жасалған болатын. Шарттарға сәйкес, олар 2023 жылғы 14 маусымда нысанды аяқтауы керек еді, бірақ оны орындамады. Осыдан кейін біз компанияны мемлекеттік сатып алудың жосықсыз қатысушысы деп тану үшін сотқа жүгіндік. Біздің талап-арызымыз 2023 жылғы тамызда қанағаттандырылды, сондай-ақ сот оларды құрылысты аяқтауға міндеттеді. Бірақ содан бері олар ешқандай әрекет жасамай, құрылысты толығымен тоқтатты, сот шешімін орындамады. Біз оларды қылмыстық жауапкершілікке тарту үшін әділет департаментіне жүгіндік», — деді заңгер.
Сонымен қатар, Ботаника және фитоинтродукция институты тұрақсыздық айыбын өндіріп алу туралы талап-арыз берді, оны да сот қанағаттандырды. Сонымен бірге Ерік Тойжанов қазіргі уақытта ботаникалық бақ демеушілер іздеп жатқанын атап өтті.
«Егер қазір қандай да бір демеуші табылса, теориялық тұрғыдан үлгеруге болады. Бізге қазір бастысы күмбезді жауып, жылытуды іске қосу керек. Ал абаттандыру бойынша қалған жұмыстарды қыста немесе келесі жылы жүргізуге болады», — деді ол.