Ақмола облысында Атбасар ауданы әкімдігінің құрылыс бөлімі басшыларына, «Престиж Строй 7» ЖШС және «Фундаменталь» ЖШС-ке қатысты үкім жарияланды. Олар 300 млн теңгеден астам қаражатты жымқыруда кінәлі деп танылды.
Өңір прокуратурасының баспасөз қызметінің мәліметінше, бұл қаражат 2021 жылы үкімет резервінен Атбасар ауданының су басу аймағында тұратын 200 отбасын көшіру үшін екі үй салуға бөлінген.
Істі Ақмола облысының арнайы прокурорлары тергегені атап өтіледі.
Сот үкімімен жымқыруға қатысушылар ҚК 189-бабы 4-бөлігі («Ерекше ірі көлемдегі жымқыру») және ҚК 218-бабы («Қылмыстық жолмен алынған мүлікті заңдастыру») бойынша сотталды. Оларға сәйкесінше 8,6 және 7,6 жыл бас бостандығынан айыру жазасы тағайындалды. Сонымен қатар, сотталғандардың мүлкі тәркіленді. Сот үкімі заңды күшіне енген жоқ.
Еске салайық, бұған дейін Ақмола облысының Атбасар аудандық соты Сергеев ауылдық округінің әкімі Қайрат Қожахметовті 2024 жылғы көктемгі су тасқыны кезінде Самарка ауылында 19 үйдің су астында қалуына әкеп соққан, тергеу нұсқасы бойынша, немқұрайлылық үшін кінәлі деп таныған еді.
Өз кезегінде сотталған әкім өз кінәсін жоққа шығарады. Ол әлеуметтік желілердегі парақшасында жарияланған бейнеүндеуінде жағдайдың «күйе жігіті» болғанын мәлімдеді.