Қазақстан өңірлеріндегі жылқылардың жаппай қырылуы туралы жаңалықтар аясында ҚР ауыл шаруашылығы министрлігінің өкілдері Ұлытау облысына тексеру жүргізді.
«Жаңаарқа ауданына келгеннен кейін делегация мынаны анықтады: қолайсыз ауа райы жағдайларына, 2023 жылғы желтоқсан және 2024 жылғы ақпан айларында жауын-шашынның түсуіне және одан кейінгі температураның төмендеуіне, сондай-ақ жайылымдық жерлердің мұздануына байланысты жылқыларды тебіндеу қиындап, бұл жас төлдер мен қартаң малдардың азып-тозып, қырылуына әкелді. ИСЖ деректер базасының мәліметтері бойынша, ауданда 84,3 мың бас жылқы бар», - деп хабарлайды министрліктің баспасөз қызметі.
____________
Анықтама үшін: ИСЖ - ауыл шаруашылығы жануарларына жеке сәйкестендіру нөмірін беру бойынша портал және деректер базасы. Осы рәсімнің арқасында әрбір жануар жынысы, жасы, түсі және иесі туралы мәліметтер көрсетілген паспорт алады.
Ауыл шаруашылығы министрлігінің өкілдері Жаңаарқа кенті мен Қаражал қаласы арасында 23 жылқының қырылғаны тіркелгенін, олардың сәйкестендіру нөмірлері болмағанын және ИСЖ-де тіркелмегенін хабарлады.
Сонымен қатар, Жаңаарқа ауданында сәйкестендіру нөмірлері жоқ 44 өлі жылқы табылды. Ауыл шаруашылығы министрлігінде аудандық ветеринариялық станцияларға жылқылардың қырылу фактілері туралы өтініштер түспегенін айтты. Осылайша, министрлік қызметкерлері 67 қырылған жануарды сәйкестендіре алмады, сондай-ақ олардың иелерін анықтай алмады.
Сонымен қатар, ведомство Ұлытау облысында 2 мың жылқының, оның ішінде Жаңаарқа ауданындағы мал басының жартысына жуығының қырылғаны туралы ақпаратты жоққа шығарады.
Еске салайық, бұған дейін хабарланғандай, Ақмола облысының фермерлері далада қырылып жатқан малды құтқаруды және шұғыл түрде ТЖ режимін енгізуді сұраған болатын. Ол жерде жылқылар қысқы жайылымдарда аштықтан қырылды - аномальды ауа райы олардың мұз басқан қар астындағы шөпке жету мүмкіндігінен айырды. Ветеринарлардың мәліметтері бойынша, кем дегенде 200 жылқының қырылғаны белгілі болды.