В Өскеменде полиция қызметкерлері алкоголь өнімдерін лицензиясыз сату фактісін анықтады. Тексеру барысында айналымнан 436 дана алкоголь өнімі алынды, ал бұзушылық фактісі бойынша әкімшілік іс қозғалды.
НЕ БОЛДЫ
Polisia.kz деректері бойынша, бұзушылық республикалық жедел-профилактикалық іс-шара «Алкогольсіз ауыл» кезінде анықталды. Полиция қызметкерлері Өскемен қаласындағы сауда нысандарының бірінде алкоголь өнімдерін сату фактісін тоқтатты.
Жеке кәсіпкердің ҚР заңнамасында көзделген лицензиясыз алкоголь өнімдерін сатқаны анықталды. Осы факті бойынша әкімшілік іс қозғалды.
ҚАНДАЙ ӨНІМДЕР АЛЫНДЫ
Процестік іс-әрекеттер барысында заңсыз айналымнан 436 дана алкоголь өнімі алынды. Олардың ішінде — 254 бөтелке күшті алкогольді сусындар және 182 дана сыра өнімдері.
Алынған тауар заттай дәлелдеме ретінде танылды. Өнімдер процестік шешім қабылданғанға дейін жауапты сақтауға орналастырылды.
ПОЛИЦИЯДА НЕ ХАБАРЛАДЫ
Шығыс Қазақстан облысы полиция департаменті (ШҚО ПД) алкоголь өнімдерін сатуға тек тиісті рұқсат құжаттары болған жағдайда ғана жол берілетінін еске салды.
Ведомство сондай-ақ алкоголь өнімдерінің заңсыз айналымы фактілерін анықтау және жолын кесу жұмыстары жалғасып жатқанын атап өтті.