Осы жылдың қаңтарынан шілдесіне дейін сыбайлас жемқорлық істері бойынша 95 полиция қызметкері сотталды.
Бірінші несие бюросына сілтеме жасап БАҚ хабарлағандай, 80% жағдайда полицейлерге үкімдер «Пара алу» және «Алаяқтық» баптары бойынша шығарылған.
«47 полицей пара алғаны үшін, ал 27-сі алаяқтық үшін сотталды. Қалған үкімдер пара беру, парақорлыққа делдалдық ету, өкілеттіктерді теріс пайдалану, қызметте әрекетсіздік және өкілеттіктерден асып кетумен байланысты», - делінген хабарламада.
Биыл жалпы сыбайлас жемқорлық істері бойынша 557 адам сотталды. 182 адам бас бостандығынан айырылды, ал 247 адамға жалпы сомасы 3,4 млрд теңге айыппұл салынды. 56 адам жазадан босатылды.
7 ай ішінде сыбайлас жемқорлық істері бойынша ақтау үкімдері екі рет қана шығарылғаны, екі жағдайда да полиция қызметкерлеріне қатысты болғаны атап өтіледі.
Естеріңізге сала кетейік, тамыз айының басында көші-қон қызметі басқармасының (КҚБ) бұрынғы басшысы мен инспекторы, сондай-ақ Абай облысы Әуезов аудандық полиция бөлімінің экс-инспекторы сыбайлас жемқорлық үшін сотталды.
Тергеу нұсқасы бойынша, басқарма басшысы КҚБ инспекторы – делдал арқылы әрекет етіп, полицейден қызмет ауыстыру үшін пара алған. Пара сомасы $1000 (476 890 теңге) құраған.
Маусым айында Шымкент патрульдік полиция полкінің 8 ротасының командирі Азамат Айымбетов ірі көлемде пара алу арқылы жымқырғаны үшін 7 жыл бас бостандығынан айырылуға сотталды.
Сәуірде Шымкент полиция департаменті көші-қон басқармасының бастығы Сұңғат Түгелбаев $8 мың мөлшерінде пара алғаны үшін сотталды. Экс-басшы шетелдіктерге тұруға рұқсат беру және азаматтық беру үшін пара алған. Полицеймен бірге делдал Ақмарал Сойырқаз да сотталды.
Өткен жылғы қыркүйекте Сыбайлас жемқорлыққа қарсы қызмет Абай облысы полиция департаменті көші-қон қызметі басқармасының бастығы Гүлвира Дөненбаеваны ұстады. Дөненбаева өзінің бағыныштысы арқылы аудандық полиция қызметкерін муниципалды көші-қон қызметі бөлімшесіне ауыстыруға көмектескені үшін $1000 мөлшерінде пара алғаны хабарланды.