Таразда Жамбыл облысы бойынша Көліктік бақылау инспекциясының басшысы м.а. Дәулет Кемелов сотталды.
Антикордың баспасөз қызметінің мәліметінше, ол жүк көліктерінің иелері мен жүргізушілері М. Мамыров, Н. Абдуллаев және Е. Канатовтан 100-ден 450 мың теңгеге дейін пара алғаны үшін кінәлі деп танылды.
Пара облыс аумағында кедергісіз жүріп-тұру үшін берілген.
Айта кету керек, Мамыров пара берумен қатар, Абдуллаев пен Канатовтан пара алуда делдал болған.
Нәтижесінде Кемеловке 6 жыл бас бостандығынан айыру жазасы тағайындалды, Мамыровқа – 3 жыл бас бостандығынан айыру. Пара берушілер Абдуллаев пен Канатов 5,6 млн теңге көлемінде айыппұл төлеуге міндеттелді.
Сонымен қатар, сотталғандарға мемлекеттік қызметте және квазимемлекеттік мекемелерде лауазымдарды атқаруға өмір бойына тыйым салынды.
Еске салайық, Дәулет Кемеловтың Сыбайлас жемқорлыққа қарсы қызметтің назарына іліккені қаңтар айында хабарланған болатын.
Сол кезде 2022 жылдың шілдесінде Кемелов басқарған Жамбыл облысы бойынша көліктік бақылау инспекциясында бақылау бекеттерінде қажетті жабдықтың жоқтығы, бейнежазбалардың формальді жүргізілуі және бұзушылардың жүйелі түрде жауапкершіліктен жалтаруы анықталғаны белгілі болды.
Міндеттерін тиісінше орындамау салдарынан жеке және заңды тұлғалардың 2,2 млн теңгеден астам сомадағы айыппұлдардан жалтаруына әкеп соққаны үшін Кемелов пен үш инспектор толық емес қызметтік сәйкестік туралы ескерту алды.
Айтпақшы, расталмаған мәліметтер бойынша, Дәулет Кемелов Алматының экс-әкімі Бақытжан Сағынтаевтың жиені және Автомобиль көлігі және көліктік бақылау комитетінің төрағасы Алтай Әлінің туысы деп болжануда.