Ақтөбе гарнизонының әскери соты 25744 әскери бөлімінің медициналық ротасының материалдық-техникалық қамтамасыз ету взводының командиріне үкім шығарды.
Zakon.kz мәліметінше, 2024 жылы наурызда бөлім аумағын тазарту кезінде сержант еденнен темекі қалдықтарын тауып, екі мерзімді әскери қызметшіні оларды жеуге мәжбүрлеген. Оқиғадан кейін қатардағы жауынгерлердің бірі тамақтан улану белгілерімен бөлімнің медициналық пунктіне жүгінген. Сот отырысында жәбірленуші мәжбүрлеу фактісін растаған.
Жүрек айнуы мен құсуды сезінген екінші сарбаз сотта сэндвичтен уланғанын және командирге шағымы жоқ екенін мәлімдеген.
Іс материалдарына сәйкес, кейінірек сержант бөлмедегі ретсіздікке наразы болып, сарбаздардың бірінің кеуде тұсына бірнеше рет соққы жасаған. Сарбаз құлағаннан кейін күдікті ұрып-соғуды жалғастырып, оны жатып тұруға мәжбүрлегені атап өтілген.
Хабарланғандай, оқиғадан кейін өз қауіпсіздігі үшін қорыққан жәбірленуші әкесіне хабарласып, алған жарақаттарының суреттерін жіберген.
Сот отырысында айыпталушы кінәсін мойындамай, бөлімнің жаңа командирі келгенге дейін тазалық жүргізген мерзімді әскери қызметшілерге ауызша ескертумен шектелгенін айтқан.
Сот сержантты билікті немесе қызметтік өкілеттіктерді асыра пайдаланды деп танып, оған екі жыл бас бостандығын шектеу жазасын тағайындады. Сонымен қатар, сержант жазасын өтеу мерзімі ішінде жыл сайын 100 сағат мәжбүрлі еңбекке тартылды.
Еске салайық, Ақтаудағы № 25744 әскери бөлімі бірқатар қайғылы оқиғалармен белгілі. Мысалы, 2015 жылы қыркүйекте теңіздегі оқу-жаттығу кезінде осы бөлімнің төрт әскери қызметшісі суға батып қайтыс болды.
2022 жылы мамырда № 25744 бөлімінің қолбасшылығы мерзімді әскери қызметшінің оғаш мінез-құлқын байқады. Ол айналада болып жатқан оқиғаларға түсініксіз реакция танытып, өз-өзімен сөйлескен. Үйіне оралғаннан кейін ата-анасы «ол ешкімді танымайды, қайда екенін және не істеп жатқанын білмейді» деп мәлімдеді.
Сонымен қатар, 2023 жылы қыркүйекте оқу полигонында осы бөлімнің 20 жастағы әскери қызметшісі қайтыс болды. Белгісіз заттың жарылуынан ол әртүрлі жарақаттар алып, ауруханаға бара жатқанда қайтыс болды.
Сол жылдың мамыр айында Ақтаудағы № 25744 бөлімінің 13 әскери қызметшісі 55 млн теңгеден астам сомаға жанар-жағар май материалдарын ұрлады деп айыпталғаны хабарланды. Қылмысқа сержанттан полковникке дейінгі әскери қызметшілер қатысқан. Кейін сотталғандар үш жарым жылдан сегіз жылға дейін бас бостандығынан айыру жазасын алды.
2024 жылы наурызда аталған бөлімнің әскери қызметшісі жаңадан келген сарбаздардың басына табуреткамен және шоқпармен соққы жасағаны белгілі болды. Оған қатысты қылмыстық іс қозғалып, кейін тараптардың татуласуына байланысты тоқтатылды.
Қыркүйек айында «Батыс» өңірлік қолбасшылығының № 25744 әскери бөлімінде лагерь бойынша кезекшінің атуы салдарынан мерзімді әскери қызметші қаза тапты. Кейін желіде қайтыс болған сарбаздың әкесі ұлының бетіне оқ атқанын және оны офицер жасағанын айтқан видео тарады.
Қазан айында Маңғыстау облысында қатардағы мерзімді әскери қызметшілерді ұрып-соққаны үшін 25744 әскери бөлімінің 1-ші шабуыл батальонының отты қолдау ротасының аға сержанты сотталушылар отырғышында болды. Айыпталушы кінәсін мойындағанымен, жазадан құтылып кетті.