Жезқазған қалалық соты Ұлытау облысы мәдениет, тілдерді дамыту және архив ісі басқармасының басшысы Ануар Омарға кезекті үкім шығарды. Бұған дейін ол сыбайлас жемқорлық үшін сотталған болатын.
Сыбайлас жемқорлыққа қарсы қызметтің баспасөз қызметінің мәліметінше, Ануар Омардан басқа айыпталушылар қатарында оның бағыныштысы – тілдерді дамыту бөлімінің басшысы Сарбаева А., «Облыстық ғылыми-әдістемелік орталық» КМКҚ басшылары Жолашарова Г. және «Тілдерді дамыту ресурстық орталығы» КММ басшысы Оспанова Ж., сондай-ақ жеке компания өкілі Талғат О. болды.
Олар Жезқазғанда мәдени іс-шараларды ұйымдастыру бойынша 3,9 млн теңге сомасына қосымша келісімді заңсыз жасасу арқылы лауазымдық өкілеттіктерін теріс пайдаланды деп танылды.
Нәтижесінде басқарма басшысы 6 жыл 6 ай бас бостандығынан айыруға сотталды, оның сыбайластарына 1 жыл мерзімге бас бостандығын шектеу түріндегі жаза тағайындалды. Сонымен қатар, сотталғандарға мемлекеттік қызметте және квазимемлекеттік сектор субъектілерінде лауазымдарды атқаруға өмір бойына тыйым салынды.
Еске салайық, 2024 жылғы наурызда Ануар Омар мен Тарихи-мәдени мұраны қорғау орталығының басшысы мердігер ұйымның өкілінен 2 млн теңге көлемінде пара алғаны үшін кінәлі деп танылды. Пара жалпы қамқорлық және облыс аумағындағы ежелгі қорымдар ауданындағы археологиялық қазбалар бойынша шарттағы актілерге қол қою үшін берілген. Сот содан кейін шенеуніктерді 6 жыл бас бостандығынан айыруға үкім шығарды. Мердігер компания өкіліне 3,5 жыл бас бостандығынан айыру жазасы тағайындалды.
Сол жылдың тамыз айында белгілі болғандай, Ануар Омар жалпы сомасы 2,3 млн теңге бюджет қаражатын жымқырғаны үшін сотталды. Ол музейтанушы мамандар мен басқа да ғалымдардың мақалалар жинағын шығару бойынша орындалмаған жұмыстар үшін қаражатты заңсыз иемденгені хабарланды. Бірінші үкімді ескере отырып, айыпталушыға жиынтық түрде 6 жыл 6 ай бас бостандығынан айыру жазасы тағайындалды.
Фото inbusiness.kz сайтынан алынған