Петропавлдағы жанжалмен баспана алған жетімдер пәтерлердегі ылғалдылық пен кәріздік сасық иістен зардап шегуде.
«Қазинформ» ХАА мәліметінше, шыдамсыз иіс сәуір айында кейбір үйлердің жертөлелері ағынды сулармен су басқаннан кейін пайда болған. Бірнеше ай бойы тұрғындар биліктен мәселені шешуді сұрап келеді, алайда әкімдік әлі күнге дейін ешқандай маңызды шара қолданбаған.
«Жертөлелер кәріз суына толы. Бұл — әкімдік өкілдері мен депутат жиналыста айтқандай, еріген су емес. Су тасқыны әлдеқашан өтіп кетті. Біз төртінші қабатта тұрамыз, иіс қорқынышты. Пәтерде маса көп, барлық саңылаулардан кіреді. Ұйықтау мүмкін емес. Ешқандай құрал көмектеспейді. Әкімдікке бірнеше рет жүгіндік, басқарушы компанияның өкілдері келді. Суды сордырдық, бірақ бір-екі күннен кейін жертөлелер қайтадан толып, иіс қайтады», — деді үш баланың анасы, жетім Ксения Тытенок.
Үйдің тағы бір тұрғыны Зарина Пивняк пәтерлердегі ылғалдылық пен жәндіктерге шағымданады. Сондай-ақ, ол жергілікті тұрғындар іргетастың құлауынан қорқатынын айтты.
«Мен бірінші қабатта тұрамын. Балалар бөлмесінің бұрышы дымқылданып, терезе жарылып кетті. Иіс тұрақты, жуынатын бөлмеге кіру мүмкін емес. Төсекте жатсаң — иіс, балконға шықсаң — иіс. Масалар, шіркейлер. Шкафтың төменгі жәшіктеріндегі кір дымқыл. Мұнда әрі қарай қалай тұратынымызды білмеймін. Қыста бәрі қатып қалады, ал көктемде не болады? Бұл жалдамалы коммуналдық тұрғын үй, біз ештеңе істей алмаймыз. Үй кепілдікте, бірақ құрылыс салушы бізбен байланысқа шықпайды. Бірақ біз барлық қызметтерді бірінші күннен бастап төлеп келеміз. Судың іргетасты бұза бастауынан қауіптенеміз», — деді әйел.
Сонымен қатар, шілде айында Петропавл санитарлық-эпидемиологиялық бақылау басқармасының қызметкерлері үйлердің жанынан бактериологиялық және санитарлық-паразитологиялық көрсеткіштерге су мен топырақ сынамаларын алғаны белгілі болды.
Зерттеу нәтижелері бойынша топырақтан аскарида жұмыртқалары табылды, содан кейін сарапшылар шара қолдану үшін әкімдікке хат жолдады.
Өз кезегінде қала әкімі Серік Мұхамедиев үйлердегі жағдайға түсініктеме берді.
«Бізде алты жалдамалы коммуналдық үй бар. Ол жерде жертөлелер су астында қалған болатын. Кәріз құбырына қатысты да бірқатар мәселелер бар. Ол бітеліп қалған. Қазір тазалап жатыр. Бір жерде құбыр отырып қалған, ауыстырдық. Қазір «Қызылжар су» жүйені шайып жатыр. Жалпы, аяқталуға жақын. Сорғыны толығымен жуды. Ол іске қосылғаннан кейін мәселе шешіледі. Мәселе көктемде пайда болды, біз білеміз. Алдымен жақындау қиын болды. Содан кейін себебін түсіне алмадық: топырақтан су кірді ме, әлде басқа нәрсе ме? Соңында бір жерде кәріз жүйесі сумен бұзылғанын түсіндік. Сонымен қатар, лайлану деңгейі жоғары. Яғни, жұмыс сапасыз орындалған. Қазір ретке келтіреді. Жақын арада мәселе шешіледі деп ойлаймын», — деді әкім.
Белгілі болғандай, жұмыстарды жүргізген компаниямен келісімшарт өткен жылы бұзылған. Қазір мәселені жоюмен «Қызылжар су» ЖШС айналысады. Бас директор Жеңіс Сұлтанов үйлердің жертөлелеріндегі жұмыстардың алдағы апталарда аяқталатынына уәде береді.
«Бұл «Қызылжар суға» қатысты мәселе емес, бірақ біз олардан бұл жұмысты «аяқтауды» сұрадық, олар мамандар. Жертөлелерді ретке келтіреміз. Әрі қарай абаттандыру мәселесі де шешілмеген. Барлығын соңына дейін жеткіземіз», — деп сендірді әкім.
«Береке» шағын ауданындағы 6 үй 2021 жылы пайдалануға берілуі керек еді, бірақ оларды өткен қыста ғана тапсырғаны атап өтілді.
Баспана күткендердің арасында негізінен әлеуметтік осал санаттағы адамдар, оның ішінде жалғызбасты аналар, жетім балалар, көпбалалы отбасылар және басқалар болды. Пәтерлерді олар жанжалмен алғаны хабарланады.
Бастапқыда кілттер оларға мемлекеттік мереке қарсаңында берілген, бірақ ол кезде адамдар үйге кіре алмаған. Кіреберістер құлыптаулы болған.
«Жергілікті билік жағдайды әртүрлі себептермен түсіндірді. Кезекте тұрғандар тізімін жаңартудан бастап электр кабелінің үзілуіне дейін. Азаматтар пәтерлерге БАҚ-та резонанс тудырғаннан кейін ғана кіре алды. Сонда Петропавл әкімі Серік Мұхамедиев жеке өзі тұрғындарға келіп, кешірім сұраған болатын», — делінген хабарламада.