Жетісу облысы бойынша Бәсекелестікті қорғау және дамыту агенттігінің (БҚДА) Департаменті «Хоргос» халықаралық шекаралық ынтымақтастық орталығының (ХШЫО) үш еншілес ұйымы – «Хоргос-Коммерц» ЖШС, «Хоргос-Энерго» ЖШС және «Хоргос-Сервис» ЖШС әрекеттерінде монополияға қарсы заңнаманың бұзылуын анықтады.
Ведомствоның баспасөз қызметінің мәліметінше, сот шешімінен кейін аталған компаниялар бұрынғы форматтағы қызметін тоқтатты.
Монополияға қарсы орган серіктестіктерді жекешелендіруді және оларды бәсекелес ортаға беруді ұсынды, бұл оларға нарықтық жағдайда жұмысын жалғастыруға мүмкіндік береді.
Еске сала кетейік, бұған дейін Астана бойынша БҚДА департаменті «Қазақстан темiр жолы» (ҚТЖ) ҰК» АҚ еншілес ұйымы – «KTZ EXPRESS» АҚ монополиялық жоғары бағалар белгілеу фактілерін анықтады. Нәтижесінде әкімшілік құқық бұзушылықтар жөніндегі мамандандырылған ауданаралық сот «KTZ EXPRESS» АҚ-на 10 114 304 теңге мөлшеріндегі монополиялық кірісті тәркілей отырып, 853 379 теңге мөлшерінде айыппұл салды.