Премьер-министр Олжас Бектенов су тасқынынан кейін тұрғын үй мен инфрақұрылымды қалпына келтіру мәселелері жөнінде кеңес өткізіп, онда еліміздің кейбір өңірлері жұмыс кестесінен 15-25 күнге артта қалып отырғанын айтты.
Үкімет баспасөз қызметінің мәліметінше, атап айтқанда, құрылыстың төмен қарқыны Батыс Қазақстан, Ақтөбе, Ақмола және Атырау облыстарында байқалған.
Су тасқыны салдарынан барлығы 19 342 жылжымайтын мүлік нысаны зардап шеккені, оның 8 578-і қалпына келтіруге жатпайтыны анықталды. Бүгінгі таңда 2 578 үйдің құрылысы және 6 мың нысан жылжымайтын мүлікті сатып алу бойынша жұмыстар жүргізілуде.
Сонымен қатар премьер-министр Солтүстік Қазақстан облысында 200 және Павлодар облысында 5 жаңа үйдің құрылысының жеделдігін атап өтті. Сондай-ақ, алдағы күндері Қостанай облысында 22 үйдің тапсырылуы күтілуде.
Бұдан басқа, үкімет басшысы әкімдерге әрбір нысанда көбірек адам мен техниканы тартуды тапсырып, Президент қойған міндеттерді орындауға шамамен 2,5 ай қалғанын еске салды.
«Қалпына келтіру жұмыстарының қарқынын жеделдету керек. Құрылыс материалдарын жеткізуге, еңбек ресурстарын және алаңдардағы арнайы техниканы жұмылдыруға байланысты барлық мәселелерді жедел шешу қажет. Кестеден артта қалуға әкеп соғатын барлық проблемалар туралы орталыққа дереу хабарлаңыз. Қажет болған жағдайда біз ресурстарды қайта бөлеміз, сіздерді техникамен және адамдармен күшейтеміз. Барлық құрылыс нормалары мен қауіпсіздік талаптарының сақталуын қамтамасыз ету маңызды», — деп атап өтті Олжас Бектенов, өнеркәсіп және құрылыс министрлігіне құрылыс жұмыстарының сапасын бақылауды тапсырды.
Сонымен қатар, Бектенов өнеркәсіп және құрылыс министріне, сондай-ақ энергетика және көлік вице-министрлеріне құрылыс алаңдарында жұмыстардың аяқталуын бақылау үшін жұмыс уақытының негізгі бөлігін өңірлерде болуды тапсырды.
Жергілікті жолдарды жөндеу және қайта жаңартуға үкімет резервінен 22,7 млрд теңге бөлінгені, зардап шеккен өңірлердегі мектептерді қалпына келтіруге 7,5 млрд теңге жіберілгені хабарланады. Барлық мектептер оқу жылы басталғанға дейін қалпына келтіріледі деп күтілуде.