Астанадағы Қажымұқан Мұңайтпасұлы атындағы стадионның құрылысы Арнайы мемлекеттік қор есебінен қаржыландырылатын жобалар тізіміне енгізілді.
Қаржы министрлігінің сайтында жарияланған құжатта стадион құрылысына 17,3 млрд теңгеден астам қаражат бөлінгені айтылған.
Айта кетейік, былтырғы қараша айында БАҚ Мұңайтпасұлы атындағы стадионның құрылысына 15 млрд теңгеден астам қаражат жұмсау жоспарланғанын жазған болатын. Сонда тендерді «BiGlobal» ЖШС ұтып алғаны хабарланған еді.
Еске салайық, 2024 жылғы қазанда Ақмола облысы Зеренді ауылында спорт кешені мен Түркістан облысының Темірлан ауылында музыка мектебін салуға Арнайы мемлекеттік қордан шамамен 3 млрд теңге бөлу жоспарланғаны хабарланған болатын.
Сонымен қатар, Қазақстанда мемлекетке қайтарылған 12 млрд теңгеге әлеуметтік жобаларды іске асыру басталды. Осындай жобалардың бірі - Алматыда заманауи мәдениет орталығының құрылысы.
Қараша айында үкімет Ақтөбеде ерекше балаларға арналған балабақша салуға Арнайы мемлекеттік қордан 7,8 млрд теңге бөлуді жоспарлағаны хабарланған болатын.
Кейінірек осы қордан Риддердегі көпбейінді аурухана кешенінің құрылысын аяқтауға 28 млрд теңгеден астам қаражат бөлінді.
Желтоқсанда үкімет Петропавлда 280 орындық балабақша салуға одан 2 млрд теңгеден астам қаражат бөлуді шешті.
Осы жылдың қаңтарында Алматы облысы Кеген ауданының Жалағаш ауылында құны 1,1 млрд теңге болатын спорт кешенін қайтарылған активтер есебінен салу жоспарланғаны хабарланған болатын.
Ақпан басында үкімет Ұлытау облысы Қаражал қаласында мектеп салуға Арнайы мемлекеттік қордан 1,4 млрд теңгеден астам қаражат бөлді.
Кейінірек үкіметтің Жетісу облысы Кербұлақ ауданының Көксай ауылында мектеп салуға қайтарылған активтерден 1,4 млрд теңге бөлгені белгілі болды.
Сондай-ақ, қордан Семейде Арнайы әлеуметтік қызметтер көрсету орталығын салуға 2,6 млрд теңге бөлінгені хабарланды.