Түркістанда Кентау қалалық сотының бас маманы – сот отырысының хатшысы Д. Бегалиевке үкім шығарылды.
Антикор қызметінің мәліметінше, ол азаматтық процеске қатысушылардың бірінің 7,3 млн теңгесін алаяқтық жолмен иемденгені үшін кінәлі деп танылды.
Тергеу анықтағандай, Бегалиев ерлі-зайыптылардың мүлкін бөлу туралы іс бойынша оң шешім шығаруға жәрдемдесемін деген сылтаумен ақшаны иемденген.
Сот Бегалиевке 4 жыл 6 ай бас бостандығынан айыру жазасын тағайындап, мемлекеттік қызметте және квазимемлекеттік сектор субъектілерінде лауазымдарды атқаруға өмір бойына тыйым салды.
Еске салайық, қазан айында Алматыда әкімшілік құқық бұзушылықтар жөніндегі ауданаралық соттың судьясы Дастан Слямкуловтың ұсталғаны хабарланған болатын. Ол бірнеше рет пара алды деген күдікке ілінген. Сонымен қатар, Алматы полиция департаментінің бес қызметкері, оның үшеуі Жетісу ауданының полицейлері кінәлі деп танылып, тергелуде.
Қараша айында Оралда пара алу кезінде қалалық соттың төрағасы Руслан Жұмағұлов ұсталды. Сотталушыға қылмыстық жазаны айыппұлмен ауыстыру туралы оң шешім үшін 1,5 млн теңге көлемінде пара берілгені хабарланды.
Желтоқсан ортасында Антикор Шымкенттің қылмыстық істер жөніндегі ауданаралық сотының судьясына қатысты тергеуді аяқтады. Онымен бірге іс бойынша бірқатар адамдар тергелуде. Олар алаяқтық және сотталушының әйелін пара беруге итермелеу деген күдікке ілінген. 110 млн теңге көлеміндегі пара үкім шығару кезінде жазаны жеңілдету үшін берілген.
Кейінірек Петропавлда Солтүстік Қазақстан облысының мамандандырылған ауданаралық экономикалық сотының төрағасы ұсталды. Ол пара алу кезінде әшкереленді.