(27 ақпан 2026 | Дереккөз: Атырау облыстық сотының баспасөз қызметі)
Атырау облысының қылмыстық істер жөніндегі мамандандырылған ауданаралық сотында қайын енесін өлтірді деп айыпталған әйелге қатысты қылмыстық іс қаралды. Іс сотқа сотталушының есі дұрыс емес деп танылуына байланысты мәжбүрлеп емдеу шараларын қолдану мәселесін шешу үшін түсті.
Сот іс-әрекеттің жасалғанын анықтап, әйелдің есі дұрыс емес күйде әрекет еткенін мойындады.
ОТБАСЫНДАҒЫ ЖАНЖАЛ ҚАЛАЙ ДАМЫДЫ
Сот материалдары бойынша, 2025 жылғы 10 мамырда ер адам өзінің 1942 жылы туған, төсекке таңылған қарт анасын күтімге Жасқайрат ауылына әкелген. Оның әйелі бұған қарсы шығып, отбасылық жанжалға әкелген.
2025 жылғы 27 мамырда әйел күйеуінің жоқтығын пайдаланып, дәрменсіз қайын енесінің басына ас үй пышағымен 4-5 соққы жасаған. Жәбірленуші аудандық ауруханаға жеткізілген, сонда қайтыс болды.
САРАПТАМА СОТТАЛУШЫНЫ ЕСІ ДҰРЫС ЕМЕС ДЕП ТАНЫДЫ
Кешенді сот сараптамасы бойынша, 1986 жылы туған әйел созылмалы психикалық ауру — параноидты шизофрениямен ауырады. Денсаулық жағдайына байланысты ол сот отырыстарына қатыса алмайды.
Сот сотталушының кінәсі куәгерлердің айғақтарымен, оқиға орнын қарау хаттамаларымен, бейнежазбалармен және сараптама нәтижелерімен расталғанын атап өтті.
ТАРАПТАРДЫҢ ҰСТАНЫМЫ МЕН СОТ ШЕШІМІ
Прокурор әйелге қарқынды бақылауы бар арнайы түрдегі психиатриялық ауруханада мәжбүрлеп емдеуді тағайындауды сұрады. Жәбірленуші тарап бұл ұстанымды қолдады.
Сот әйелдің ҚК 99-бабы 2-бөлігінің 3-тармағында («Кісі өлтіру») көзделген іс-әрекетті есі дұрыс емес күйде жасағанын анықтады. ҚК 16-бабына («Есі дұрыс емес») сәйкес ол қылмыстық жауапкершіліктен босатылды.
Сот қаулысымен оған мәжбүрлеп емдеу шаралары — қарқынды бақылауы бар арнайы түрдегі психиатриялық ауруханада емдеу тағайындалды.