Шымкентте құрылыс басқармасы басшысының бұрынғы орынбасары Серік Күшербековке қатысты ірі сот талқылауы аяқталды.
Ratel.kz деректері бойынша, ол бюджет қаражатын жымқыру, қызметтік өкілеттігін теріс пайдалану және заңсыз кірістерді заңдастыру қылмыстарын қоса алғанда, бірқатар ауыр экономикалық қылмыстарда кінәлі деп танылды. Онымен бірге екі сыбайлас – құрылыс компаниясының директоры және бұрынғы мемлекеттік қызметші де сотталды.
Тергеудің анықтауынша, 2023–2024 жылдары Күшербеков «Тұрғын үй Шымкент» ЖШС директоры қызметін атқара жүріп, көппәтерлі тұрғын үйлердің ортақ мүлкін күрделі жөндеудің мемлекеттік бағдарламасын 83,4 млн теңге сомасына іске асыруға қатысқан. Қаражатты бөлу кезеңінде ол «Shanyrak Stroy Invest» ЖШС-нің директоры Бағлан Пернебекпен заңсыз сөз байласқан. Бастапқыда таңдалған мердігер «ПМК-7 ЛТД» орнына «Shanyrak Stroy Invest» компаниясымен жаңа келісімшарт жасалған, жұмыс көлемі айтарлықтай өскен – 39 үйден 78 үйге, ал келісімшарт сомасы 172 млн теңгеден астамды құраған.
Іс материалдары бойынша, жұмыстың басым бөлігін бұрынғы мердігер орындап қойған, бірақ жаңа мердігер барлық қарастырылған бюджетті алған. Ал нақты шығындар, тергеудің бағалауынша, аударылған соманың үштен бір бөлігін ғана құраған. Жымқыруды жасыру үшін қосалқы мердігерлерді тарту схемасы қолданылған.
Ұқсас әрекеттер техникалық тексеруді және 43 көпқабатты үйдің энергетикалық аудитін ұйымдастыру кезінде де қайталанған. Бірдей жұмыстар үшін төлем екі рет жүргізілген: алдымен ресми сараптама ұйымына 6,4 млн теңге, содан кейін тағы да «Shanyrak Stroy Invest» ЖШС-не келісімшарт жасаспай, бірақ едәуір көп сомаға – 88 млн теңгеден астамға төленген.
Дәл осындай схема авторлық қадағалау қызметтерін қаржыландыру кезінде де қолданылған, бірақ бұл үшін келісімшарттар басқа мердігерлермен жасалған.
Тергеу сонымен қатар қылмыстық жолмен алынған кірістерді заңдастыру фактісін анықтаған: 2024 жылғы қаңтарда Күшербеков пен Пернебек Қытайдан құны 21 млн теңгеден астам ZEEKR 001 электромобилін сатып алған. Автокөлік алдымен Пернебекке тіркелген, кейін Шымкенттегі шенеуніктің жұбайына ресімделген.
2024 жылғы сәуірде Күшербеков қалалық құрылыс басқармасы басшысының орынбасары болып тағайындалған, алайда желтоқсан айында ол ұсталған. Одан кейін екі сыбайласы да қамауға алынған. Іске қатыстылардың ешқайсысы кінәсін мойындамай, жауапкершілікті жосықсыз мердігерге артқан.
Шымкент қаласының ауданаралық қылмыстық соты үшеуін де кінәлі деп тапты. Серік Күшербековке 7,5 жыл бас бостандығынан айыру жазасы тағайындалды, оның сыбайластары Бағлан Пернебек пен Аблайхан Дүйсенбаев әрқайсысы 7 жылға бас бостандығынан айыруға сотталды. Сонымен қатар, сотталғандар мемлекеттік қызметте және коммерциялық құрылымдарда лауазымдарды атқару құқығынан айырылды.
Сондай-ақ, олардан шамамен 89 млн теңге көлеміндегі залал сомасын өндіріп алу белгіленді. Заңсыз кірістерге сатып алынған автокөліктер, оның ішінде қытайлық электромобиль және Lada мен Mercedes-Benz маркалы көліктер тәркіленді. Сотталғандардың үкімге апелляциялық шағым беру құқығы сақталады.
Еске салайық, мамыр айында Қарағанды облысы бойынша мемлекеттік мүлік және жекешелендіру департаментінің басшысы Дастан Хамзин қазынашылық департаментінің ғимаратын жөндеу бойынша орындалған жұмыстар актісіне қол қойғаны үшін 1 млн теңге көлемінде пара алуда кінәлі деп танылды.