Шымкент қылмыстық істер жөніндегі ауданаралық соты №126 «Айнатас» орта мектебінің бас бухгалтеріне үкім шығарды.
Ведомство баспасөз қызметінің мәліметінше, жалақыны есептеу кезінде ол жеке шотына негізсіз 2,6 млн теңге аударған.
Сотталушы кінәсін толық мойындап, келтірілген залалды өтеп, соттан бас бостандығынан айырумен байланысты емес жаза тағайындауды сұрады.
Нәтижесінде сот бас бухгалтерді кінәлі деп тауып, оған 2 жыл бас бостандығынан айыру және мемлекеттік қызметте және мемлекеттік мекемелерде лауазымдарды атқаруға өмір бойына тыйым салу түріндегі жаза тағайындады.
Еске сала кетейік, қаңтар айында хабарланғандай, Алматы Антикоры «Әділдік жолы» РҚБ Алматы филиалымен бірлесіп №141 жалпы білім беретін мектептен қаржылық бұзушылықтарды анықтады. Аталған мектептің бухгалтері 2019 жылдан 2023 жылға дейін бюджет қаражатын ұрлап, мемлекетке 57 млн 773 мың теңге көлемінде залал келтірді деген күдікке ілінді.
Ақпан айында белгілі болғандай, Алматы облысының Антикоры «Алматы облысы Іле ауданының білім бөлімі» ММ басшысына қатысты сотқа дейінгі тергеу жүргізуде. Ол 680 млн теңге ұрлады деген күдікке ілінді. Тергеу оның Іле ауданының орта мектептерінде жұмыс істемеген адамдарға жалақы есептеген деп санайды.
Қыркүйек айында Ақмола облысында Целиноград ауданы білім бөлімінің бухгалтері 5,8 млн теңге ұрлағаны үшін сотталды.
Қазан айында Шымкентте М.Әуезов атындағы №96 жалпы білім беретін мектептің бас бухгалтеріне үкім шығарылды, ол ай сайын жеке шотына заңсыз бюджет қаражатын аударып отырған. Жалпы ол 5,1 млн теңгеге иелік еткен.