Шымкент қылмыстық істер жөніндегі ауданаралық сотында мектептің бас бухгалтеріне қатысты қылмыстық іс қаралды. Ол аса ірі мөлшерде бюджет қаражатын жымқыру және заңдастыруда айыпталды.
Шымкент соттарының баспасөз қызметінің мәліметінше, айыпталушы өзіне сеніп тапсырылған мүлікті жымқырып, мемлекетке 451 173 978 теңге мөлшерінде материалдық залал келтірген.
Жымқырылған ақшаға әйел автомобиль, пәтерлер, жер учаскесі және бағалы қағаздар сатып алып, осылайша қылмыстық жолмен алынған қаражат пен мүлікті заңдастырған.
Сотталушының кінәсі куәгерлердің айғақтары, заттай дәлелдемелер, жасырын тергеу әрекеттерінің нәтижелері және іс бойынша өзге де материалдармен дәлелденді.
Айыпталушы кінәсін толық мойындап, шын жүректен өкініп, соттан жазаны кейінге қалдыруды сұрады.
Нәтижесінде сот мектеп бухгалтерін кінәлі деп танып, оған 8 жыл бас бостандығынан айыру жазасын тағайындады. Сот үкімі заңды күшіне енген жоқ.
Естеріңізге сала кетейік, бұрын Түркістан облысында үкімдер Жетісай аудандық білім бөлімінің 46 қызметкеріне қатысты шығарылған болатын. Олар өздеріне сеніп тапсырылған мүлікті жымқырғаны үшін кінәлі деп танылды. Сот отырысында екі бөлім басшысы және 44 мектеп бухгалтері отырды. Олардың әрекеттерінен келтірілген залал 4 млрд теңгеден астамды құрады.