Шымкент қаласы бойынша ҚММ департаменті жерасты жалған алкоголь өндірісінен түскен кірістерді жылыстату схемасын анықтады.
Ведомство баспасөз қызметінің мәліметінше, 2022 жылдан бастап Карсеновтар ерлі-зайыптылары жалған акциздік маркалары бар заңсыз алкоголь өндірісін ұйымдастырған. Шымкенттен басқа, өнімді көршілес өңірлерге – Түркістан және Жамбыл облыстарына да сатқан.
Тінту кезінде күдіктілерден 9 мың литрден астам этил спирті, 24 мың жалған акциздік марка, дайын алкоголь өнімдері және 75 млн теңге тәркіленді. Жерасты цехының қызметінен түскен қылмыстық кіріс 309 млн теңгеден астам деп бағаланды.
Тергеу барысында ерлі-зайыптылардың тапқан қаражатқа жалпы құны 234 млн теңге болатын 13 қымбат автокөлік сатып алғаны анықталды («Toyota Land Cruiser 300», «ZEEKR 001», «KIA K8», «Hyundai Grandeur», «VOLVO» және т.б.). Олар тәркілеуден құтылу үшін кейбір көліктерді жақын туыстарына ресімдеген.
Сот ерлі-зайыптыларды кінәлі деп танып, оларға 5 және 6 жыл бас бостандығынан айыру жазасын тағайындады. Қылмыстық жолмен алынған қаражатқа сатып алынған 13 автокөлік, сондай-ақ 75 млн теңге мемлекет кірісіне тәркіленді.
Естеріңізге сала кетейік, 2024 жылғы наурызда Тараз қаласының соты «ASCO Pro» ЖШС-нен 110,2 млн теңгеге алкоголь өнімдерін тәркілеуді бұйырды. Кәсіпорынның бұрынғы басшысы тәркіленген тауарды өзіне қалдыруға тырысып, 1 жыл 3 ай бас бостандығынан айыру жазасын алды.
Тамыз айында Шымкентте жалған алкоголь өндіретін жерасты цехы анықталды. Жергілікті тұрғын заңсыз өнімді сату үшін «Absolut», «Зеленая марка», «Айдабульская», «Qulan» және басқа да брендтерді пайдаланған.
Желтоқсанда хабарланғандай, үш күн ішінде полицейлер заңсыз айналымнан тиісті құжаттары жоқ 7 тоннадан астам спирт құрамды өнімді тәркіледі. Шамамен 160 мың бума заңсыз темекі, 26 мыңнан астам вейп, оларға арналған 34 мыңнан астам картридж, 35 мың май текшесі және мыңнан астам бума снюс тәркіленді.