(6 ақпан 2026 | Дереккөз: «24.kz» телеарнасы)
Шымкент тұрғындары 3 ақпанда жағалау бойынан ондаған және жүздеген өлі балықты тапты. Мамандар болған оқиғаны суға химиялық ағындылардың түсуімен байланыстырады. Экологтардың алдын ала болжамы бойынша, кәріз жүйесіне қышқыл ерітіндісі төгілген, ол кейін өзенге құйылған.
Бұл оқиға су бұру жүйесіне қосылған коммуналдық және өндірістік нысандарды тексеруге себеп болды.
БОЛЖАМДЫ ЛАСТАНУ КӨЗІ ТУРАЛЫ НЕ БЕЛГІЛІ
«24.kz» телеарнасының мәліметінше, ластанған ағындылар бірнеше сағат бойы кәріз құбыры арқылы өзенге түскен. Қазіргі уақытта қышқыл ерітіндісін төгуге жол берген кәсіпорын анықталуда.
Сонымен бірге, зақымдалған кәріз құбыры теңгерімінде тұрған «Водные ресурсы маркетинг» ЖШС-не қатысты тексеру басталды. Сондай-ақ желінің осы учаскесіне қызмет көрсететін ұйымның жауапкершілігі қарастырылуы мүмкін.
ЭКОЛОГТАРДЫҢ ҰСТАНЫМЫ
Экология департаментінің сынақ зертханасының жетекшісі Ақмарал Нысанбекова қышқыл ерітінділерін төгуге кәріз жүйесі арқылы да тыйым салынғанын мәлімдеді.
«Департамент мамандары «Водные ресурсы маркетинг» ЖШС су арнасын тексеруді бастайды. Кейін қышқыл ерітіндісін төгуге қай кәсіпорын жол бергені белгілі болады. Қышқыл ерітіндісін кәріз құбырына да төгуге болмайды, оны бейтараптандыру керек, жергілікті тазарту қондырғылары болуы тиіс», — деді ол.
Санитариялық-эпидемиологиялық бақылау өкілдері қала тұрғындарына сатып алар алдында балыққа арналған құжаттарды мұқият тексеруді ұсынды.