ҚР Бас прокуратурасы Қырғызстаннан қазақстандық азаматты трансұлттық ұйымдасқан топ құрамында қаржы пирамидасын құру және басқарғаны үшін қылмыстық жауапкершілікке тарту мақсатында экстрадициялады.
Ведомствоның баспасөз қызметінің мәліметінше, топ мүшелері 2017 жылдан 2020 жылға дейін Қазақстан аумағында «QI-Trade» қаржы пирамидасын ұйымдастырған.
Белгілі болғандай, күдіктілер 4,7 мыңнан астам салымшыға тиесілі шамамен 15 млрд теңгені иемденген. Қатысушылардың бір бөлігі әртүрлі жаза түрлеріне сотталған, ал жоғарыда аталған азамат жасырынып, халықаралық іздеу жарияланған.
Іздеуде жүріп, күдікті Қырғызстан аумағында кісі өлтіру қылмысын жасап, соған байланысты сотталған.
Қазақстан Бас прокуратурасының сұрауы бойынша ол қаржы пирамидасын құру және басқарғаны үшін қылмыстық жауапкершілікке тарту мақсатында берілді. Осыдан кейін ол Қырғыз Республикасына қайтарылады.
«Осылайша, фигурантты Қазақстан аумағында жасаған қылмысы үшін жаза күтіп тұр, көрші мемлекет аумағында жазасын өтегеннен кейін», - делінген хабарламада.
Бұған дейін Бас прокуратура осы қылмыстық топтың екі мүшесін Ресей мен Польшадан экстрадициялағаны атап өтіледі. Олар әртүрлі жылдарға бас бостандығынан айыру жазасына сотталған.
Еске сала кетейік, былтырғы шілде айында Армениядан Қостанай облысында «Finiko» қаржы пирамидасын басқарды деген күдікті экстрадицияланған еді. Оның әрекеттерінің нәтижесінде 40-қа жуық зардап шеккен адам 167 млн теңгеден астам қаражатынан айырылды.