Желіде Алматы облысының уақытша ұстау изоляторынан (УҰИ) бейне тарады. Кадрларда Талағардағы Шерзат Полатты өлтіруге күдіктілер туған күнді тойлап жатқаны көрінеді.
Бейнеде қамаудағылар «Алиса» дауыстық көмекшісін пайдаланып әуен қосады, торттағы шамдарды сөндіреді, сусын ішеді және билейді. Сонымен қатар, кадрда кемінде екі ұялы телефон байқалады.
Өз кезегінде облыстық полиция департаменті ақпаратқа түсініктеме берді.
«УҰИ-дан бір қамаудағының туған күнін тойлауы түсірілген бейнежазбаның таралу фактісі бойынша жан-жақты тексеру жүргізілуде. Барлық кінәлі тұлғалар, оның ішінде басшылық та, қатаң жауапкершілікке тартылады. Тергеу барысы ерекше бақылауға алынды. Осы құқық бұзушылыққа ықпал еткен себептер мен жағдайларды жою бойынша шаралар қабылданды», - делінген хабарламада.
Еске салайық, 4 қазанда Талғарда дүкендердің бірінің жанында жаппай төбелес болып, оның кезінде 16 жасар Шерзат Полат пышақ жарақатынан қайтыс болды, тағы екі адам дене жарақатын алды.
12 қазанға қараған түні қайтыс болған жасөспірімнің отбасының үйі өртенді. Осы оқиғадан кейін бірден құқық қорғау органдары жедел штаб құрып, отбасы күзетке алынды. Өрт орнынан канистр мен қолғап табылды. ІІМ Шерзатты өлтіру ісі бойынша 11 адам күдікті ретінде өтіп жатқанын хабарлады.
Желтоқсанда Талғардың шетінен өлтірілген Шерзат Полаттың ағасының мәйіті табылды. Хабарланғандай, ол асылып өліп, өз-өзіне қол жұмсаған.
Кейін жерлеу кезінде Шерзаттың әкесі - Болат Қаржаубай ұсталды. Полицейлер оның қатысуымен «қоғамдық тәртіп пен айналадағылардың қауіпсіздігіне қауіп төндіретін» оқиға болғанын мәлімдеді. 15 тәулік әкімшілік қамақ жазасын өтегеннен кейін Қаржаубай босатылды.