Петропавлда СҚО мамандандырылған ауданаралық экономикалық сотының төрағасы ұсталды. Жоғарғы соттың баспасөз қызметінің мәліметінше, ол пара алуда әшкереленген.
«Қазақстан Республикасы Ұлттық қауіпсіздік комитеті мен Сот әкімшілігінің Ішкі қауіпсіздік департаментінің Петропавл қаласындағы бірлескен операциясы нәтижесінде СҚО мамандандырылған ауданаралық экономикалық сотының төрағасы Б. мүдделі тараптың пайдасына оң сот шешімі шығару үшін 15 мың АҚШ доллары көлемінде ірі көлемде пара алған кезде әшкереленді», - делінген хабарламада.
Еске сала кетейік, қазан айында желіде Алматы қаласының Медеу аудандық сотының бұрынғы судьясы Светлана Жолманованың ұсталғаны туралы ақпарат пайда болды. Ол бірнеше жәбірленушіге қатысты алаяқтық жасады деген күдікке ілінген.
Айта кетейік, Жолманованың алаяқтыққа күдікті екені 2021 жылдың сәуірінде белгілі болды. Сол кезде оның қызметтік кабинетінде тінту кезінде 10 мың АҚШ доллары тәркіленген еді.
Кейін Жоғарғы сот төрағасының өкімімен судьяның өкілеттігі тоқтатылды. 2023 жылы Президент Қасым-Жомарт Тоқаев оны қызметтен босатты.
Қазан айының ортасында Алматыда әкімшілік құқық бұзушылықтар жөніндегі ауданаралық сотының судьясы Дастан Слямқұловтың ұсталғаны хабарланды. Ол бірнеше рет пара алды деген күдікке ілінген. Сонымен қатар, Алматы қалалық полиция департаментінің бес қызметкері, оның ішінде Жетісу ауданының үш полицейі кінәлі деп танылып отыр.
Қараша айында Орал қаласында пара алу кезінде қалалық соттың төрағасы Руслан Жұмағұлов ұсталды. Сотталған адамның қылмыстық жазасын айыппұлға ауыстыру туралы оң шешім шығару үшін 1,5 млн теңге көлемінде пара берілгені хабарланды.
Желтоқсан айының ортасында Сыбайлас жемқорлыққа қарсы қызмет Шымкент қаласының Қылмыстық істер жөніндегі ауданаралық сотының судьясына қатысты тергеуді аяқтады. Онымен бірге іс бойынша бірқатар адамдар өтуде. Олар алаяқтық жасады және сотталушының жұбайын пара беруге итермеледі деген күдікке ілінген. Үкім шығару кезінде жазаны жеңілдету үшін 110 млн теңге көлемінде пара берілген.