ҚР Жоғарғы соты 469 гектар жерді Павлодар облысының құрамына қайтару туралы қаулы шығарды. Бұған дейін бұл учаскелер ондаған жылдар бойы Қарағанды облысымен пайдаланылып келген. Бұл ауданы 17,1 мың га құрайтын даулы аумақтың аз ғана бөлігі.
Ratel.kz мәліметіне сәйкес, қақтығыс 2021 жылдың көктемінде Павлодар облысы Баянауыл ауданының «БұхарЖырау» шаруа қожалығы мен Қарағанды облысы Осакаров ауданының «Birlik Agro Invest» ЖШС қызметкерлері бір мезгілде бір жер учаскесін өңдеу құқығына талаптанған кезде шиеленіскен.
«Шаруа қожалығының қызметкерлері егіс дайындығына кірісу үшін келгенде, оны Қарағанды облысы Осакаров ауданының «Birlik Agro Invest» ЖШС дайындап қойғанын анықтады. Қарағандылықтарға іштей рахмет айтып, павлодарлықтар дайындалған учаскені егіп тастады. Содан кейін егуге қарағандылықтар келіп, наразылық білдірді. Жергілікті учаскелік полиция қызметкері тараптарға санкция қолдануды уәде етіп, оларды жер учаскесіне қатысты сотқа жіберу арқылы болған соқтығыстың алдын алды», - делінген хабарламада.
Сот талқылауы барысында даулы учаскенің екі түрлі мекеме: Қарағанды облысы Осакаров ауданының жер қатынастары бөлімінің «Birlik Agro Invest» ЖШС-ке (2061 жылға дейін) және Павлодар облысы Баянауыл ауданының жер қатынастары бөлімінің «Бұхар Жырау» ШҚ-на (2048 жылға дейін) жалға берілгені анықталды.
Мұрағат құжаттарына сәйкес, Павлодар облысы 1938 жылы құрылып, оның құрамына Қарағанды облысынан Баянауыл ауданы енгізілген. 1963 жылы шекараларды анықтауда қателік анықталып, 17,1 мың га Қарағанды облысының аумағынан ресми түрде алынып тасталғаны атап өтілген.
«1960 жылдарға дейін Қарағанды облысы Осакаров ауданының колхоздары Павлодар облысы Баянауыл ауданының мемжерқорының жерлерін пайдалануды жалғастырды. 1963 жылғы 1 қарашада Павлодар облысымен іргелестік бойынша 17,1 мың га қателік түзетіліп, бұл алаң Қарағанды облысының аумағынан ресми түрде алынып тасталды. Бірақ іс жүзінде қайтарылмады. 1980 жылғы 16 қазанда Қазақ КСР Ауыл шаруашылығы министрі Павлодар облысы Баянауыл ауданына Қарағанды облысының «Молодежное» АШБ өз бетінше басып алған жерлерін қайтару туралы бұйрық шығарды», - делінген хабарламада.
Өз кезегінде Қазақ КСР Министрлер Кеңесі төрағасының орынбасары Қарағанды облыстық атқару комитетіне басып алынған аумақтарды босатуды тапсырған, бірақ нұсқаулар орындалмаған.
Нәтижесінде Жоғарғы соттың азаматтық істер жөніндегі сот алқасы «БұхарЖырау» шаруа қожалығының Осакаров ауданының жер қатынастары бөлімі мен «Birlik Agro Invest» ЖШС-не қатысты жер учаскесін жалға беру шартын жарамсыз деп тану туралы талабын қанағаттандыру туралы қаулы шығарды.
«2019 жылғы 9 желтоқсандағы «Қарағанды облысы Осакаров ауданының жер қатынастары бөлімі» мемлекеттік мекемесі мен «Birlik Agro Invest» ЖШС арасында шаруа немесе фермер қожалығын жүргізуге арналған ауыл шаруашылығы мақсатындағы жер учаскесін уақытша өтеулі жер пайдалану туралы №110 шарттың Павлодар облысы, Баянауыл ауданы, Ұзынбұлақ ауылдық округінің аумағында орналасқан ауданы 468,5 га жер учаскесіне құқық беру бөлігі жарамсыз деп танылсын», - делінген қаулыда.
«БұхарЖырау» ШҚ өкілі Күміс Түсіпбекова даулы аумақтың қалған мыңдаған гектарына дау айту ниетін білдірді.