Оралда қалалық сәулет және қала құрылысы бөлімінің басшысы Тәшенбаев А., оның қарамағындағы бас маман Ғатау Н. және «Алиханстройпроект» ЖШС директорының орынбасары Құпбаев А. туралы үкім жарияланды.
Сыбайлас жемқорлыққа қарсы қызметтің баспасөз қызметінің мәліметінше, Тәшенбаев Құпбаевтан аз қабатты үйлердің құрылысына эскиздік жобаларды келіскені үшін 1,5 млн теңге көлемінде пара алғаны үшін кінәлі деп танылды. Сондай-ақ ол саудасыз жер телімін заңсыз беру арқылы лауазымдық өкілеттігін теріс пайдаланғаны үшін де әшкереленді.
Ғатау Құпбаевтан жер телімін таңдау актісін келіскені үшін 500 мың теңге көлемінде пара алғаны үшін кінәлі деп танылды. Сонымен қатар, ол ғимарат болмаған кезде мемлекеттік қызметтер порталына жер телімін кеңейту туралы құжаттарды заңсыз енгізу жолымен лауазымдық өкілеттігін теріс пайдаланғаны үшін сотталды.
Нәтижесінде Тәшенбаев пен Ғатауға 3,5 жыл бас бостандығынан айыру жазасы тағайындалды. Пара беруші 7 жыл бас бостандығынан айыруға сотталды.
Сонымен қатар, сотталғандарға мемлекеттік қызметте және квазимемлекеттік сектор субъектілерінде қызмет атқаруға өмір бойына тыйым салынды.