Энергетика министрлігі теміржол көлігімен мұнай өнімдерін экспорттауға тыйым салуды тағы алты айға ұзартпақ.
Ведомство баспасөз қызметінің мәліметінше, ішкі нарықта ЖЖМ тапшылығының алдын алу үшін шектеуді ұзартуы мүмкін.
«ҚР Энергетика министрлігі «ҚР аумағынан мұнай өнімдерін әкетудің кейбір мәселелері туралы» бірлескен бұйрықтың тиісті жобасын әзірледі, ол ҚР аумағынан мұнай өнімдерін, оның ішінде Еуразиялық экономикалық одаққа мүше мемлекеттерге әкетуге алты ай мерзімге тыйым салуды белгілейді, бұл мұнай өнімдерін автомобиль және теміржол көлігімен әкетуге тыйым салуды көздейді», - делінген хабарламада.
Бүгінде ЖЖМ тұтынудың әдеттен тыс өсуі және ішкі нарықтағы қалдықтардың азаюы байқалатыны хабарланды. Атап айтқанда, еліміздің оңтүстік шекаралас өңірлерінде айтарлықтай өсім байқалады.
«Бұл жағдай Қазақстан Республикасы мен көршілес елдердегі мұнай өнімдері бағасындағы бар айырмашылыққа байланысты, бұл олардың шекаралас елдерге ағуына әкеп соғады», - делінген хабарламада.
Бірлескен бұйрықтың жобасы «Ашық НҚА» сайтында жарияланды.
Еске сала кетейік, 2024 жылғы 29 наурыздан бастап Қазақстаннан бензин, дизель отыны және жекелеген мұнай өнімдерін әкетуге тыйым салынды. Тыйым жарты жылға әрекет етуі керек еді. Мамыр айында Қазақстанда автомобильдер мен пойыздарда сұйытылған мұнай газын әкетуге тағы жарты жылға тыйым салынатыны хабарланған болатын.
Одан сәл бұрын, жыл басынан бері қазақстан-ресей шекарасында 13 650 литр көлемінде ЖЖМ заңсыз әкетудің 103 әрекеті, ал қазақстан-өзбек шекарасында 68 әрекеті анықталғаны белгілі болды, бұл жағдайда энерготасымалдаушылардың контрабандасының жалпы көлемі 11 135 литрді құрады. 3,7 млн теңге көлемінде айыппұлдар салынды.