Түркістан облысындағы жеке мектептердің мұғалімдері облыстық әкімдікке жалақылары төленбегеніне шағымданды.
24.kz деректеріне сәйкес, педагогтар үш ай бойы жалақы алмаған. Мұғалімдердің бірі, көпбалалы ана Анар Әлімбекова жалдамалы пәтерде тұрады. Тұрғын үй мен балаларын асырау үшін ол таныстарынан ақша қарызға алуға мәжбүр. Сонымен қатар, ол несиелер бойынша ай сайынғы төлемдерді төлей алмайды.
«Желтоқсаннан бері жалақы алмаймыз. Арамызда көпбалалы аналар мен жалғызбасты әйелдер бар. Ипотека төлеуі тиіс адамдар да бар. Төлемдердің кешігуіне байланысты бізді пәтерлерден шығарып жатыр. Қазір қыс, мен қайда барамын, не істейміз?», - деді Анар Әлімбекова.
Белгілі болғандай, өткен жылдың соңына дейін жеке мектептерді қаржыландыру Ағарту министрлігінің жанындағы Қаржы орталығы арқылы жүзеге асырылып келген. 2025 жылдан бастап төлемдер бойынша жауапкершілік жергілікті атқарушы органдарға берілді.
Жеке мектептердің бірінің құрылтайшысы Үміт Омиралықызы қазір мекеменің мұғалімдері алдындағы қарыз 34,5 млн теңге құрайтынын айтты.
«2023 жылғы желтоқсан үшін әлі қарыз ілулі тұр — шамамен үш миллион. Мұғалімдердің алдында ұят, оларға не айтарымызды білмейміз. Мемлекеттік мектептер жақында ақпан айының жалақысын алады. Ал біз мұғалімдерімізге не айтамыз?», - делінген хабарламада.
Басқа бір жеке мектептің құрылтайшысы Салтанат Мадалиева мұғалімдерге жалақы төлеу үшін несие алуға мәжбүр болғанын айтты.
«Бізде көптеген қызметкерлер бар, барлығының отбасы, несиесі бар. Мен өзім кеше желтоқсан айының жалақысын төлеу үшін 8 млн теңге несие алдым. Бірақ несие ала берсек, құримыз. Қаржы орталығында бізге ақша жергілікті жерлерге жіберіліп, сол жерден төленуі керек дейді. Біз мәселені шешу үшін әкімдікке, білім басқармасына келдік», - деді Мадалиева.
Өз кезегінде Түркістан облысы білім басқармасы басшысының м.а. Жандос Махамбетов жеке мектептерге қаражат аудару республикалық бюджеттен уақтылы қаржыландырылмауына байланысты кешіккенін мәлімдеді.
«Сонымен қатар, желтоқсан айының қарызы қалды. Қазір біз министрлікпен берешекті өтеу бойынша жұмыс істеп жатырмыз. 10 күн ішінде бұл мәселе толық шешіледі. Желтоқсан айындағы қарыздар Қаржы орталығы арқылы төленетін болады», - деді ол.
Түркістан облысында 55 мың бала оқитын 147 жеке мектеп бар екені атап өтіледі. Ағарту министрлігінің мекемелер алдындағы екі айдағы жалпы берешегі 10 млрд теңгеден асты. Бұл ретте Қаржы орталығының өткен жылғы желтоқсан айындағы қарызы есепке алынбаған.