Премьер-министрдің орынбасары, ұлттық экономика министрі Серік Жұманғарин үкіметтің кеңейтілген отырысында жаңа салық реформасын таныстырды, ол қосылған құн салығы (ҚҚС) бойынша шекті мөлшерді 15 млн теңгеге дейін төмендетуді көздейді.
Informburo.kz мәліметінше, ол үкіметтің ҚҚС мөлшерлемесін көтеру жоспары туралы айтты. Министрлер бұл сомаларды парламент депутаттарымен талқылайды.
Өз кезегінде Президент Қасым-Жомарт Тоқаев үкіметтің ұсынысын қолдады.
«Жұмыс істей беріңіздер. Мен реформаның қажет екенін растаймын. Бірақ қазір біздің алдымызда Ұлттық қордан берілетін трансферттер санын азайту, оның жинақтау қызметін күшейту міндеті тұр. Қорда жиналған қаражатты ірі инфрақұрылымдық жобаларды қаржыландыруға бағыттау керек. Осылайша біз мемлекеттің даму жөніндегі қызметін күшейтеміз. Дегенмен, бұл мәселені бізге жетілдіру қажет деп ойлаймын», – деді Тоқаев.
Президент Қазақстанда экономиканы әртараптандыру міндеті орындалмаған күйінде қалып отырғанын, бұл Ұлттық қор қаражатына тәуелділіктің жалғасуынан көрініп тұрғанын атап өтті.
_____________
Анықтама үшін: экономиканы әртараптандыру - бұл ел немесе аймақ экономикасы құрылымының кеңеюі мен күрделену процесі, нәтижесінде бір немесе бірнеше негізгі салаларға тәуелділік азаяды.
Сонымен қатар Жұманғарин салық мөлшерлемесінің көтерілуіне байланысты үкімет әлеуметтік салықты және міндетті зейнетақы жарналарын жоюды жоспарлап отырғанын хабарлады.
«ҚҚС мөлшерлемесінің көтерілуіне байланысты бизнесте, әрине, қосымша шығындар пайда болады. Мемлекет оларды өтеуге дайын. Ең алдымен, біз еңбекақы төлеу қорына жүктеме ең жоғарылардың бірі екеніне назар аударғымыз келеді. Міне, осы жерде экономикамыздың ең үлкен проблемасы жатыр. Бизнес төлейтін еңбекақы төлеу қорына жүктеме шамамен 40% құрайды. Ал бұл тауардың өзіндік құны», – деді министр.
Оның айтуынша, бұл өнімнің қымбаттауына және оның бәсекеге қабілеттілігінің төмендеуіне әкеледі.
«ҚҚС мөлшерлемесі жоспарланған деңгейге дейін ұлғайған жағдайда, біз әлеуметтік салық пен жұмыс берушінің міндетті зейнетақы жарналарын жою есебінен еңбекақы төлеу қорына жүктемені орта есеппен 10%-дан 30%-ға дейін айтарлықтай төмендетуге дайынбыз. Бұл шығыстарды бюджет өз мойнына ала алады», – деп қосты Серік Жұманғарин.
Ол үкіметте салықтардың басқа түрлерін республикалық бюджеттен жергілікті бюджеттерге қайта бөлу тәсілдері қарастырылып жатқанын атап өтті.