Бала құқықтары жөніндегі уәкіл Динара Закиева Маңғыстау облысы Маңғыстау ауылындағы мектепке барды, онда жақында 500-ге жуық бала уланған болатын.
ORDA мәліметінше, омбудсмен сабақтар жалғасып жатқанын, бірақ балалар басқа жерде тамақтанып жүргенін айтты.
«Асхана тексеру уақытына жабылды. Осыған байланысты кіші сыныптар үшін оқу күні қысқартылды», — деді Закиева.
Сонымен қатар Динара Закиева неліктен бұған дейін уәкілетті органдар мектепте тексеру жүргізбегенін түсіндірді.
«Мәселелердің бірі — СЭС нақты шағымдарсыз тексеру жүргізуге құқығы жоқ. Бір жылдан кейін әйелдер құқығы және балалар қауіпсіздігі туралы заң аясында қабылданған норма күшіне енеді, бұл СЭС-ке жоспарлы тәртіпте тексерулер жүргізуге мүмкіндік береді», — деп түсіндірді омбудсмен.
Сонымен қатар Закиева сарапшылармен және мемлекеттік органдармен бірлесіп, мектептегі тамақтану сапасын жақсарту және жеке кәсіпкерлер ұсынатын қызметтердің қауіпсіздігін арттыру үшін құқықтық негіз әзірлеуге уәде берді.
Еске сала кетейік, 6 қыркүйекте Маңғыстау облысы Мұнайлы ауданы Маңғыстау ауылының Бесшокы тұрғын алабында бастауыш сынып оқушылары асханада түскі астан кейін жаппай уланған болатын.
Денсаулық сақтау министрі Ақмарал Әлназарова барлығы 462 оқушының медициналық көмекке жүгінгенін айтты. Оның 96-сы ауруханаға жатқызылды, 17-і үйіне шығарылды. Реанимацияда жатқан екі бала жалпы бөлімге ауыстырылды. Қалған 387 бала амбулаториялық ем қабылдап жатыр.
Өз кезегінде Оқу-ағарту министрі Ғани Бейсембаев елдің барлық мектептерінде тексеру жүргізуді тапсырғанын хабарлады.
Сонымен бірге белгілі болғандай, мектеп асханасына «Шәкенова Д» ЖК қызмет көрсеткен. Кәсіпорынның жылдық кірісі 2,5 млрд теңгеге бағаланатыны хабарланды. Компаниямен көптеген келісімшарттар бір көзден алу тәсілімен жасалған.