Маңғыстау облысында «М-Техсервис» ЖШС қызметкерлері жұмысты тоқтатып, «Маңғыстаумұнайгаз» АҚ басшылығына талаптар қойып, ереуіл жариялады.
Lada.kz деректері бойынша, компания қызметкерлері үкімет пен «Маңғыстаумұнайгаз» АҚ-на бейнеүндеу жазып, онда штатты қысқарту туралы алған хабарламалар туралы айтты.
«Біз «Маңғыстаумұнайгаз» АҚ басшылығынан 2024 жылғы 26 қараша және 2025 жылғы 26 ақпанда жасалған хаттамалардың орындалуын талап етеміз. Біз штаттың қысқаруы және жұмыссыз қалу қаупіне алаңдаймыз. «Маңғыстаумұнайгаз» АҚ мердігерлік ұйым «М-Техсервис» ЖШС-мен ынтымақтастықты жалғастыруын қатаң талап етеміз. Талаптарымыз орындалмаған жағдайда, біз жұмысқа шықпаймыз», – деді жұмысшылар.
Облыстық мемлекеттік еңбек инспекциясы департаменті «Маңғыстаумұнайгаз» жергілікті атқарушы органмен бірлесіп, жағдайды шешу үшін ереуілдеушілермен келіссөз жүргізіп жатқанын хабарлады.
Еске сала кетейік, өткен жылдың қараша айында Жаңаөзенде «Өзенмұнайгаз» АҚ «Бұрғылау жұмыстары басқармасының» қызметкерлері компания басшылығына талаптар қойып, ереуілге шыққан болатын. Негізгі наразылықтар бұрынғы қызметкерлердің балаларын жұмысқа орналастыру, әлеуметтік кепілдіктер және ұжымдық шарт талаптарына қатысты болды. Наразылық акциясы бір айға жуық созылып, одан кейін қызметкерлер жұмыс орындарына қайта оралды.