Қызылордада бұрынғы президент Нұрсұлтан Назарбаевтың атындағы саябақты қайта жаңғыртуға 13 120 508 659 теңге жұмсау жоспарлануда.
Мемлекеттік сатып алу порталында лот сипаттамасында тапсырыс беруші Қызылорда қалалық әкімдігінің «Қызылорда қалалық тұрғын үй-коммуналдық шаруашылық, жолаушылар көлігі және автомобиль жолдары бөлімі» ММ екені көрсетілген.
«Аумақ қаланың оңтүстік-батыс бөлігінде орналасқан, қазіргі уақытта саябақта ескі сәулеттік тұрғын емес ғимараттар, өзендер мен шағын сәулеттік формалар, бірнеше түрдегі ағаштар мен гүлзарлар бар. Сондай-ақ орталық бөлігі жасыл желектері жоқ, бос жер, құрылыс салынбаған аумақ болып табылады. Осы уақытқа дейін саябақта ешқандай заманауи сәулеттік сыртқы келбет жоқ. Жаңа эскиздік жоба бойынша аудан заманауи инфрақұрылымымен, серуендеу және демалу үшін қолайлы жағдайларымен ерекшеленетін болады», - делінген техникалық сипаттамада.
Конкурсқа қатысуға өтінімдер 2025 жылғы 8-24 қаңтар аралығында қабылданады.
Еске салайық, бұрын хабарланғандай, 2025 жылы Алматыда экологиялық жобаларға 10,6 млрд теңге бөлу жоспарлануда. Басым бағыттардың бірі қаланы көгалдандыру болады. 2025-2027 жылдарға арналған бюджеттің тиісті жобасын ведомствоның алдағы сессиясында қарау жоспарлануда.