Қаржылық мониторинг агенттігі (ҚМА) Астана қаласының аумағында тиісті лицензиясыз цифрлық активтерді заңсыз өндіру фактісі бойынша қылмыстық істі тергеп аяқтады.
Ведомствоның баспасөз қызметінің мәліметінше, күдіктілер Астанада қозғалтқыштарды өңдеу орталығының атын жамылып, бір тұрғын ауданының айлық қажеттілігімен салыстыруға болатын энергияны тұтынып, майнинг фермасының қызметін ұйымдастырған.
Екі жыл ішінде өндірілген цифрлық активтердің құны 143 млн теңгеден асты.
Сотқа дейінгі тергеп-тексеру барысында ҚМА қызметкерлері 1 300 данаға жуық майнинг жабдығын (ASIC), өнеркәсіптік желдеткіштер мен трансформаторлық қосалқы станцияны тәркіледі.
Сонымен қатар, тергеу 25,3 млн теңге сомасында электр энергиясын төлемегендігін анықтады.
Ағымдағы жылы цифрлық активтердің заңсыз айналымы саласында 7 үкім шығарылғаны, құқық қорғау органдары қылмыстық жолмен алынған, құны 1,2 млрд теңгеден асатын мүлікті тәркілегені атап өтіледі.
Еске сала кетейік, қыркүйек айының басында Президент Қасым-Жомарт Тоқаев криптовалюта майнингімен айналысып, көп мөлшерде электр энергиясын экономикаға зиян келтіріп тұтынатын және салықтарды тиісті мөлшерде төлемейтін кәсіпкерлермен «шуғылдану» қажеттігі туралы мәлімдеген болатын.
Президенттің сөзінен кейін 10 күн өткен соң ҚМА Қостанай облысында заңсыз майнерлердің қызметінің жолы кесілгені туралы хабарлады. Зұлымдық жасаушылар 3 аудан орталығының, 27 орта мектептің немесе 13 аурухананың қажеттіліктеріне тең электр энергиясын тұтынып, жергілікті электр желілеріне орасан зор жүктеме түсірген.