Әулиекөл аудандық соты Қостанай облысының Б. Кенжетаев атындағы Новонежин жалпы білім беретін мектебіндегі қабырғаның құлауы туралы істі қарады.
Өңір соттарының баспасөз қызметінің мәліметінше, оқу орнының құрылыс-монтаж және жөндеу-қалпына келтіру жұмыстарының тапсырыс берушісі болған аудан әкімдігінің білім бөлімінің басшысы жауапкершілікке тартылды.
Анықталғандай, мемлекеттік органға плитаның майысуы туралы шілде айында хабарланған. Бұл құрылыс үдерісіне қатысушылар арасындағы хат-хабарлардан, мердігер ұйымның тапсырыс берушіге жіберген қайталанған хаттарынан көрінеді, онда мәселе және қысқа мерзімде тиісті жұмыстарды жүргізу қажеттігі туралы хабарланған.
Сот отырысында айыпталушы әкімшілік құқық бұзушылық жасағанын мойындамады.
Сот білім бөлімінің басшысын кінәлі деп танып, оған 147 680 теңге мөлшерінде айыппұл түрінде әкімшілік жаза қолданды.
Еске сала кетейік, қыркүйек айының басында хабарланғандай, Қостанай облысы Әулиекөл ауданының Новонежинка ауылында оқушылар жартылай жөнделген ғимаратта білім алуға мәжбүр болған. Мектепте тек төрт кабинет дайын болып, онда орта буын оқушылары үшін сабақтар өткізілген. Жоғары сынып оқушылары жергілікті күрес залында, ал бірінші сынып оқушылары балабақшада оқыған.
БАҚ жарияланымынан кейін келесі күні хабарланғандай, Новонежин мектебінде қабырға құлаған. Әкімдіктің мәліметінше, бұл кезде мектепте балалар мен педагогтар болмаған, ешкім зардап шекпеген.