Ақтөбе облысында коммуналдық кәсіпорындардың жерасты суларын заңсыз пайдалану фактілері анықталды. Ақтөбе бөлімшесінің қызметкерлері Жайық-Каспий бассейндік инспекциясы су қорын қорғау және пайдалану бойынша бес коммуналдық мемлекеттік кәсіпорынды тексерді.
Су ресурстары және ирригация министрлігінің баспасөз қызметінің мәліметінше, облыстың екі ауданы мен Ақтөбе қаласының бірнеше тұрғын алабында бұзушылықтар тіркелді. Рұқсат құжаттарының болмауына байланысты жалпы сомасы шамамен 3,7 млн теңге әкімшілік айыппұл салынды.
Тексерулер бес коммуналдық мемлекеттік кәсіпорынды қамтыды. Қобда және Қарғалы аудандарында, сондай-ақ Ақтөбе қаласының Ақжар-1, Қызылжар, Қарғалы, Жоғарғы-Қарғалы, Өрлеу және Сазды тұрғын алаптарында су бұруға тиісті рұқсаттарсыз заңсыз су пайдалану орын алғаны анықталды.
«Әкімшілік құқық бұзушылық туралы кодекстің 462-бабының 3-тармағына сәйкес, коммуналдық шаруашылықтарға су пайдалануға арнайы рұқсаттың болмауы үшін айыппұлдар салынып, өндірілді. Айыппұлдардың жалпы сомасы шамамен 3,7 млн теңгені құрады», — деді Жайық-Каспий бассейндік инспекциясының басшысы Ерғали Үмбетбаев.
Еске салайық, шамамен бір жыл бұрын су ресурстары және ирригация министрлігі су ресурстарын басқарудағы бұзушылықтарға, судың «қара нарығы» деп аталатын құбылысқа және су саласындағы сыбайлас жемқорлық тәуекелдеріне қарсы күресті бастады.
2025 жылдың басынан бері министрлік жалпы сомасы 2,9 млн теңге болатын 18 әкімшілік айыппұл салды. Жалпы есепті кезеңде заңсыз су пайдалану фактілері бойынша жалпы сомасы 6,4 млн теңге болатын 35 әкімшілік айыппұл салынды.